Pynpaw ka HNLC ba ka jingkren ïasuk kan bteng tang lada weng noh ïa ki jingshah pynngat kyndon

Shillong, K’Lyngkot 08 : Ka kynhun kiengatiar HNLC lyngba u Ksiang jong ka, Bah Sadon Blah ba dei ruh u President ka HNYF ka pynpaw ba ka jingïakren ïasuk kan ïai bteng tang lada ka sorkar jylla kumjuh ka sorkar pdeng ki weng noh ïa baroh ki jingshah pynngat kyndon pyrshah ïa ki nongïalam bad ki dkhot jong ka kynhun.
Haba kren bad ki lad pathai khubor, u Bah Sadon u la ong, ” Lada ka sorkar ka weng noh ïa ki jingshah pynngat kyndon bad mab lut ïa ki jingleh jingkam jong ki dkhot ka seng, ka don ka lad ba ka jingïakren ïasuk kan ïai bteng namar ïa kane la tyrwa hi da ka HNLC kumta ka don ka jingkyrmen ba ka jingïakren kan ïaid biang hynrei lym kumta, ka jingïakren ka la kut”.
Shuh shuh utei u nongïalam ka HNYF haba kren kum u nongmihkhmat jong ka kynhun u la ong ba ka sorkar ka ïai ban ban iaid da ka lynti jong ka ain katba ka HNLC pat ka kwah ban iaid da ka mon jong ka sorkar. “Kumta kane ka shong mynta ka don ha ka sorkar,” u la ong.
Shuh shuh u ong ba ka kam mynta ka don ar liang, kata la ka sorkar ka kwah ban pynbeit ïa kane ka jingeh da kaba ïaid da ka lynti jong ka ain lane da kaba rai hi da ka bor sorkar.
Shuh shuh u ong ba baroh ki thma ha ka pyrthei la lah ban tehlakam ym da ka lynti ka aiñ hynrei da ka bor jong ka sorkar.
Kumta, u ong ba lada ka sorkar ka kam ba ka bor ka don ha ka HNLC, kadei ka lynti jong ka aiñ ba ka sorkar ka kwah hynrei lada ka HNLC ka ong ba ka rai ka shong ha ka sorkar, ka kynhun ka kwah bad ïai ban ba ïa ka kam dei ban leh beit da ka sorkar .
Utei u nongïalam ka HNYF u bynrap biang ruh halor ka jingdonkam ba ka sorkar kan pyntreikam ïa ujuh u lakam sha ka HNLC thik kumba ka leh ïa ki sengbhalang ha ka jingïakhih ILP ha u snem 2013.
U Bah Sadon u la ïathuh ruh ba ha ka jingïakhih ILP ha kito ki snem ïalade ruh u la shah pynngat ha kiba bun ki kyndon hynrei da ka jingïakren la weng lut lait noh tang lai tylli.
“Kumta, lada ïa utei u lakam lah ban pyntreikam ïa ki sengbhalang kiba ïakhih, balei pat ym lah ban pyntreikam lang ïa ka HNLC, kadei tang ka mon jong ka sorkar kam da donkam satia ban ïaid da ka lynti jong ka aiñ,” u la ong.
Da kaba kam ba kiba bun ki jingshah pynngat kyndon pyrshah ïa ki dkhot jong ka seng ki dei beit halor ki jingpynbthei bom, u Bah Sadon u la ong ba u kynmaw ba ha ka jingïakren ban mab noh ïa kitei ki jingshah pynngat kyndon, u AK Mishra (MHA Advisor North East) u la dep ban pynpaw ba ym da don than ki kam jong katei ka kynhun kiba triem.
“Kumta, lada kitei ki kam jong ka seng kim da dei kiba triem kumta ka sorkar ka dei ban pyrkhat bad weng noh ïa ki jingshah pynngat kyndon ïa baroh ki nongïalam bad ki dkhot jong ka kynhun,” u la ong.
U Bah Sadon u la kyntait ruh ba ka don ka jingïapait hapdeng ki nongïalam ka HNLC. “Ki long tylli lang beit ha kano kano ka rai ba ki shim. Baroh ki shithi ba ki phah shanga ha kine ki snem katba ka jingïakren ka dang ïaid la soi lang da baroh arngut kata da u Chairman bad General Secretary.”
Nalorkata u ong ruh ba kam don satia kano kano ka jingkylla haba ïadei bad ki jingdawa jong ka kynhun.
Ha kawei pat ka lïang u ong ba ka HNYF ka pynrem jur ïa ka soekar MDA namar ka jingbymlah jong ka ban pynurlong ïa kane ka jingïakren ïasuk haduh kaba kut.