Shillong, Naiwieng 29: U Myntri Rangbah ka jylla u Conrad K Sangma, uba dei ruh u MLA jong ka South Tura Constituency u la pynlong ïa ka jingïalang paidbah bad ki nongshong shnong jong ka Walbakgre bad ki nongshong shnong ka Fancy Valley.
Haba kren ha kane ka jingïalang ha shwa ban ïasyllok bad ki paidbah, u Myntri Rangbah u Conrad K Sangma, u la ong ba kum kane ka jingïalang kaba pynïasoh ïa ki paidbah ka long kaba kongsan bha naba ka long kaba donkam na ka bynta ki nongmihkhmat.
Na ka liang jong u Myntri Rangbah u la banjur ruh halor ka jingdonkam ban pynkupbor ïa ki nongshong shnong ba kin pynpaw ïa ka sur na ka bynta ka imlang sahlang bad ka jingdonkam ban long kiba don ka jingkitkhlieh.
“Kum kane ka kam kan long ka jingmyntoi ïa ki paidbah bad kane ruh ka long ka jingdonkam na ka bynta ka jingïashim bynta jong ki nongshong shnong bad ngi donkam ïa ka jingshim khia bha jong ka sorkar na ka bynta ban wanrah ïa ka jingsynshar kaba ïaid beit ïaid ryntih,” u la ong.
Ha kane ka jingïalang na ka liang jong ki paidbah ki la pynpaw ïa ki jingdonkam ha kaba ïadei bad ki kam jaka, ka jingdonkam ïa ki street light, ki CCTV, ki surok, ki paiñkhana paidbah, ki kali lumñiut, bad ka jingbymbiang ka umbam umdih nalor kiwei ki jingdonkam.
