Pynpait ki runar ïa ki jingkhang ïit, pynjulor ïa ka kali u VC, wiang ding ïa ki CCTV

Shillong, Naiwieng, 10: Ki riewshim kabu bym lah ban tip ki la leit ban pynjulor ïa ka iingsah jong u Vice Chancellor ka skulbah North Eastern Hill University (NEHU) u Prof. PS Shukla kaba don hapoh ka jylli jong ka skulbah.
Ïa ki jingshah pynjulor jong ka iingsah bad ka kali jong u Vice Chancellor la ïoh ban ring dur tad haduh ka janmiet sngi u Blei ha ka por kumba 7:00 baje janmiet hadien ba u Magistrate bad ki bor Pulit ki la pakhang lynti ïa ki samla pule kiba la tur sha ka ingsah jong u Vice Chancellor hadien ka jingïaid proseshon ba la pynlong da ka NEHU Research Scholar’s Forum ha kane hi ka sngi.
Katkum ka jingtip ba la ïohlum la ïathuh ba ka ingsah jong u Vice Chancellor ka la ngat ha ka jingshah thombor ha ki riewshim kabu bym lah ban tip kumba ha ka por 2:00 baje mynstep sngi u Blei.
Ha kane ka jingthombor, ki riewshim kabu ki la pynpait ïa ki jingkhang ïit, ïa ki khiew syntiew ba buh shabar jong ka iing bad nalor kata ki la pynjulor ruh ïa ki iit ba shakhmat jong ka kali u Vice Chancellor ba la pynieng hakhmat iing bad wiang ding ruh ar tylli ki CCTV camera ba la pyndait shabar ka ïing bad pynjulor ruh ïa ki post elektrik.
Mynta ki Pulit ki dang pynlong ïa ka jingtohkit kaba bniah ban lap ksai ïa kiba donkti ha kane ka kam runar bad ïa ka kali jong u Vice Chancellor la tan noh da ki Pulit sha thanat.
Shwa kane ka la mih ka jingïania kaba jur bha hadien ba ki Pulit ki la pakhang lynti ïa ki samla pule katba ki dang thmu ban leit pynlong ka jingïakhih shabar ingsah jong u Vice Chancellor.
U Magistrate u la ïathuh sha ki samla pule kim lah shuh ban leit sha iing sah jong u Vice Chancellor namarba um don shuh hapoh ka ing bad u la jah rngai bad ba ka ïing jong u mynta ka la don hapdeng ka jingtohkit namar ka jingshah thombor ha ki riewshim kabu.
Kine ki jingjia, ki la jia ha ka sngi kaba san ba ki samla pule ka skulbah NEHU ki la pynlong ïa ka jingïakhih da kaba shah thngan khlem pud sngi ïa kaba la khot pynlong da ka NEHUSU bad ba la kyrshan lang da ka KSU NEHU Unit.