Shillong, Nohprah, 13: Ka Shillong Traffic Police ha ka sngi Balang ka la pynjulor noh haduh 181 tylli ki Modified Silencer ba la ïoh kurup na ki nongniah kali saw shaka bad thuk thuk ar shaka ha ki jingkhynra bapher bapher.
Ka jingpynjulor ïa kine ki Modified Silencer da ki Pulit ka long kum shi bynta ka jingtrei shitom jong ki Pulit ban pyntreikam ïa ka aiñ kaba mana pyrshah ïa kino kino ki kali bad ki thuk thuk kiba pyndait ïa ki Modified Silencer.
Ïa kine ki 181 tylli ki Modified Silencer la ïoh kurup naduh u bnai Nailar, 2023 haduh mynta da ki Pulit.
Ïa ka jingpynjulor ïa kine ki 181 tylli ki Modified Silencer la leh ha phyllaw jong ka Police Reserve, Shillong ha kaba la sakhi lang da u Superintendent of Police ka East Khasi Hills u Bah Sylvester Nongtnger, u Superintendent of Police (City) Bah Vivek Syiem, u SP (Traffic) K. Prasad bad kiwei kiwei.
U Bah Nongtnger ha ka jingïakren bad ki lad pathai khubor u la ong ka Shillong Traffic Police ka la trei shitom naduh u snem ba ladep bad pynjur ïa ka jingtalasi ïa ki kali bad thuk thuk naduh u bnai Kyllalyngkot mynta u snem khnang ban pynkut shisyndon ïa ka jingpyndonkam ïa ki Modified Silencer kiba pynmih ïa ka jingsawa kaba sngew jli haduh katta katta bad kaba pynthud haduh katta katta ïa ki paidbah nongleit nongwan.
Shwa ba ka tnat Pulit kan pyntreikam ïa ka hukum, ka la pynmih shwa da ka jingkyrpad ïa ki paidbah ba buh kali saw shaka bad ar shaka ba kin weng hi dalade ïa ki Modified Silencer, hynrei hadien kane, ki pulit kiba la pynlong ka jingtalai ïa ki kali bad thuk thuk ki la lap ba dang byllai ki bym shym la sngap ïa ka jingkyrpad ka tnat Pulit.
Ka jingïoh lum pisa na ka jingdaiñ kuna ïa ki nongpynkheiñ ka la kot haduh T. 12,46,500 tang mynta u snem.
“Ïa kane pisa ba la ïoh lum na ka jingdaiñ kuna la thep sha ka pla tyngka jong ka Sorkar,” la ïathuh u Dy. S.P Bah G. Marngar.
