Nongpoh, Nailur 11: Ki Pulit ka Ri-Bhoi hadien ka jingtohkit ba tang hapoh 13 sngi ki la chargesheet ïa u LNK/121 Projen Langthasa jong ka 18th APBN, Lumding hadien ka jingkynnoh ba u la thmu ban batbor ïa iwei u heprit ha kawei ka shnong khappud ha Ri-Bhoi District.
Kum ban shu kdew hangne ba ki pulit ki la ïoh ka jingujor haka 27 tarik Nailar ba iwei I heprit I ba dang don ha lynti I la shah patan ha uwei u pulit Assam da ka jingthmu ban batbor, hynrei ïa u tei u pulit la ïoh ban bat da ki paidbah hadien ba u la pyrshang ban phet krad na katei ka jaka.
Haba ïadei bad katei ka jingjia ki pulit ki la register mukotduma ha Nongpoh Women PS hadien ba la ïoh ïa ka jingujor ejahar haka 28 tarik Nailar bad pynngat ïa u hapoh ka kyndon 3(a)/4/5(a)(iv)(m)/6/18 jong ka POCSO Act bad ki pulit ka Ri-Bhoi ki la phah ïa ka kynhun pulit sha Lumding Assam bad ïoh kem ïa utei u pulit Assam ba la tip kyrteng kum u Projen Langthasa (35) haka 30 tarik Nailar bad wanrah ïa u sha Nongpoh PS.
Kumba la kular ban pynthikna ïa ka hok jong i heprit ryngkat ka jingbishar kaba kham kloi bad ïa u nongleh kam sniew yn rai pynrem bad pynshitom kloi na ka liang u VS Rathore Senior Superintendent of Police ka Ri-Bhoi u la ong ïa u LNK/121 Projen Langthasa jong ka 18th Assam Police Battalion, Lumding la dep chargesheet hadien ba la pyndep ïa ka jingtohkit ha ka rekod ba tang hapoh 13 sngi.
