Pynngat ïa ki nonglehkam sniew ha ki kyndon aiñ bapher bapher jong ka POCSO Act: HYC

Mawkyrwat, ‘Naitung, 29: Ka Hynñiewtrep Youths Council, (HYC) South West Khasi Hills District ha ka sngi Baar ka la ïa kynduh ïa u Superintendent of Police, South West Khasi Hills District ban buddien ha kaba ïadei bad kawei ka jingjia shah bat bor jong kawei ka khynnah ba dang 13 snem ka rta ha kaba ïa kane ka kam runar la leh da u Panah jong ka, uba dei u bar jylla ha kawei na ki shnong hapoh South West Khasi Hills District.
Ïa ka jingleit ban ïakynduh ïa u SP ka long hapoh ka jingïalam u Pynskhem kharjahrin uba dei u President ka HYC South West Khasi Hills District bad uba dei ruh ha ka juh ka por u samla Nongïasaid Aiñ hapoh ka jylla ha ryngkat ka jingdonlang u Wallam Nongsiej uba dei u General.
Ha kane ka jingleit ban ïakynduh, ki la pynpaw ruh halor kawei ka jingjia shah bat tnga jubor bad shah pynïap kaba dei naduh snem 2021 ba la leh da ki ar ngut ki briew kiba la suba donkti ha kane ka kam runar, kiba la tip kyrteng kum u Modu Sangma bad u Ratan Das ha kaba kine ki ar ngut ki la leh ïa ka kam runar pyrshah ïa iwei i khynnah ba dang 12 snem karta bad iba la shah pynïap ruh.
Ha kane ka jingleit ban ïakynduh, ki la buh ka jingkyrpad ïa u SP ha kaba ïa dei bad kine ki mukotduma ïa ki nongleh kam sniew kiba la dep ban kem noh dei ban pynngat ïa ki ha ki kyndon aiñ bapher bapher jong ka POCSO Act, ong ki nongïalam ka HYC.
Hadien ka jingïakynduh bad u SP, ka seng ka la ïoh jingtip ba ka tnad Pulit ka la shimkhia bha halor ki ar tylli ki runar shah batbor ne rape case bad ka la kyntu ïa khlieh duh jong ki Pulit ban un pynkloi ruh ïa ka ‘Charge Sheet’ pyrshah ïa ki nonglehkam sniew bad ban pynthikna ruh ba ïa ki runar yn pynngat ha ka jingpynsajia kaba tyngeh.