Pynneh ïa ka bhah kam ha ka jylla kumba ka long, ong ka AKHAF ïa ka Expert Committee

Shillong, Naitung 07: Ka seng All Khasi Hills A.Chik Federation (AKHAF) ka la phah da ka jingthoh sha ka “Expert Committee” ban kyntu ïa ka committee ban pynneh pynsah ïa ka jingbhah kam ha kane ka jylla Meghalaya kumba ka long.
Kata ka long 40% ïa ki Khasi-Jaiñtia, 40% Garo, 5% ïa kiwei ki riewlum kaba tam ïa kiwei kiwei, kumba la pyntrei kam naduh ka 12/Kyllalyngkot/19712. Ka jingthung ka sorkar ïa kane ka committee kaba kyrpang ka long ban peit bniah ïa kane ka jingbhah kam ha ka jylla.
Ka seng AKHAF ka la pynpaw ba lada ka committee ka sngew ban pynkylla ïa kane ka polisi thung kam ha ka jylla, ka dei ban shim na ka bhah ba la mang kyllum ïa baroh kata 20%, ka seng ka la ai jingmut ba shim noh kata ban pynkiew ïa ka bhah jong ki Khasi-Jaiñtia sha ka 48% bad ka sah 12% dei ban mang ïa kiba bun balang.
Kane ka jingkwah jong ki ban kyntiew sha ka 48% ïa ki Khasi-Jaiñtia dei ban kynthup lang ruh ïa ki paid Garo kiba shah sha ki bynta jong ka Khasi Hills namar ki Garo kiba sah ha Khasi Hills ki long kiba dang sahdien palat. Ïa kane ka shithi kaba la phah sha ka Expert Committee la soi da u President u Clivestar Ch Marak, Secretary Manuel Ch Marak jong ka seng AKHF.