Shillong, Nailur 02: Ka kaiphod Comptroller & Auditor General of India (CAG) ka la sei ïa ki kam bamsap hapoh ka Meghalaya Legislative Assembly kaba kot ïa palat T.1.50 klur.
Hapoh ka kaiphod ka CAG halor ka State Finance Audit report jong u snem ba kut ha ka 31 tarik Lber ,2023, la kdew ba ki don artylli ki case bamsap ba hehduh ha Meghalaya Legislative Assembly, kiba kynthup ïa kawei ka jingbamsap ba kot T.44.08 lak bad kawei kaba kot T. 113.85 lak.
Shuh shuh la ïathuh ba ka Sorkar Jylla ka la pyntip ruh ïa ka jingdon haduh 72 tylli kam tuh, jingbamsap bad ka jingduh ei ïa ka pisa u paidbah kaba kot haduh T. 1.14 klur kat haduh u Lber 2023, kiba ka Sorkar kam pat leh eiei.
La ong ba katkum ka Rule 112 jong ka Meghalaya Financial Rules, 1981, kano kano ka jingbam klop ne jingduh ei ïa ka pisa u paidbah lane kino kino ki nongkynti ba la shem ha ka Government Treasury kane ki Ophis ne Tnad Sorkar, kiba hab hapoh ka Audit jong ka Principal Accountant General, dei ban pyntip mar mar sha ka Principal Accountant General, watla kane ka jingduhnong ka dei kaba leh na ka bynta ka jingbha da ki briew kiba bat ïa ka jingkitkhlieh.
Nalor kane, haba don kano kano ka kam tuh, bamsap, thok ne duh ei ka pisa Sorkar, dei ban ujor da ka ejahar sha ka Tnad Pulit, bynrap ka kaiphod.
