Pynmih kyndon ka Dorbar Shnong Panaliar halor ka kam ïalap Election hapoh shnong

Jowai, K’Lyngkot 18: Ka Dorbar Shnong Panaliar Jowai kala pyntip paidbah ba ka Executive Committee kaba la dep long kala rai ban pyntreikam ïa ki kyndon aiñ jong ka shnong ha kaba ïa dei bad ka kam ïalap Election hapoh u pud u sam jong ka shnong.
Kine ki kyndon ba ka shnong kan pyntreikam ki long kumne la khang pyrshah ban ïarung ïamih shapoh ka shnong lada dei da ki kali lane kjat, la khang ban pynsawa sur jingrwai ne pynmih ki jingklumar.
La khang pyrshah ban ïa mih paidbah ha ki por mynmiet khamtam kiba ïa kynduh briew ban ïa sam pisa. La khang ruh ba leh decoration ya ka ïing dorbar (Yungwalieh) lane ha ki rynsan Stage ha ka por ba pynlong kino kino ki jingïalang lene ban ai sha ha ka jingïalang.
Ka shnong ka la rai ban shah tang 10 (shiphew) ngut ban rung shapoh shnong, kynthup lang ïa u kyrtong bad tang ar tylli ki kali ki ban rung shapoh ka shnong, la pyntip kiba wan lang bad u kyrtong sha ka jingïalang ka shnong kan sa ai da ki Badge. Ka shnong kala pynbeit ruh ban shah tang uwei ban ai jingkren na ka bynta u kyrtong uba dei ruh nabar shnong bud sa ka jingkren na u kyrtong.
Ki Party Unit kiba kwah ban ai burom ïa u kyrtong haka por ba kren ki dei ban ïoh bor shwa na u Waheh shnong shisngi hashwa ban long ka jingïalang, katba ki briew shimet kim lah ban leh ïa kane. Kino kino ki Candidates kiba pynlong jingïalang hajan jong ka shnong Panaliar ym shah ïa ki kali jong ki ban pynïeng shapoh u pud u sam ka shnong.
Halor kine ki kyndon jingmana ka shnong kala pyntip lada lap ïa kino kino kiba leh pyrshah ym pynshitom tyngeh bad aiti syndon sha ki bor ka aiñ.