New Delhi, Naiwieng 11: Ka Tnad Electronics and Information Technology (MeitY) ka la pynmih ïa ka Standard Operating Procedure (SoP) ban pynkhlaiñ ïa ki lad ki lynti ban weng bad ïada na ki Non-Consensual Intimate Imagery (NCII) ha ki rynsan online.
Kane ka sienjam, kaba la sdang katkum ki jingbthah jong ka Madras High Court (Writ Petition – Civil No.25017/2025, hukum ba la pynmih ha ka 15.07.2025), ka thmu ban ai ïa ki rukom treikam kiba shai bad kiba pynshong nongrim ha ki lanot khnang ban weng noh kloi ïa kum kine ki jingpynmih bad ban pynthikna ïa ka jingpyntreikam kaba paka ïa ka Rule 3(2) (b) jong ka Information Technology (Intermediary Guidelines and Digital Media Ethics Code) Rules, 2021.
Ka jingthmu bad ka kam
Ka SoP ka ai ki jingbatai ba bniah na ka bynta ki lanot, ki nongïarap bad ki kynhun ba pyntreikam ïa ka aiñ ban pynthikna ïa ka jingshim ïa ki sienjam kiba stet bad kiba ryntih pyrshah ïa ka jingpynphriang online ïa ki NCII – kynthup ïa ki dur ba la pynkylla ba la pyndonkam khlem ka jingmynjur. Ka buh ïa ki lad ki lynti na ka bynta ban weng ïa ki hapoh 24 kynta naduh ba la ai jingtip.
Ki bynta ba kongsan jong ka Standard Operating Procedure (SoP)
Ki lad ïa ki lanot ban ai jingtip ba bun jait. Ki One Stop Centre (OSC): Ki lanot ki lah ban leit sha ka OSC kaba jan tam ban ïoh jingïarap, kynthup ïa ka jingïarap ha kaba ai jingtip lyngba ka National Cybercrime Reporting Portal (NCRP), ka jingkyrshan ha kaba ïadei bad ka aiñ, bad ka jingïasyllok.
Kito kiba peit ïa kane ka kam: Ki lanot ki lah ban pyntip shaphang ki jingdonkam lyngba ki lad pyntip ha ka app, ki ophisar jong ki nongpynïaid ba ïadei bad kane ka kam.
National Cybercrime Reporting Portal (NCRP): Ka plié lad ïa ki briew ba kin ai jingtip shaphang ki jingjia lyngba ki lad online da kaba phone ha u 1930.
Ki kynhun ba pyntreikam ïa ka aiñ: Lah ban ai jingujor ruh ha ki thanat ban ïoh ïa ki sienjam ba mardor.
Ka por ba la buh ïa kito kiba peit ïa kane ka kam. Baroh kito kiba peit ïa kane ka kam ki hap ban weng ne pynsangeh ïa ka lad ban ïohi ïa kine ki dur hapoh 24 kynta naduh ba la ïoh ïa ka jingujor.
Ki Significant Social Media Intermediarie (SSMI) ki hap ban pyndonkam ïa ki teknoloji hash-matching bad crawler ban ïada na ka jingmih biang jong kine ki dur ne ki dur ba ïahap bad ki.
Kito kiba peit ïa kane ka kam ki hap ruh ban ai jingtip shaphang ki sienjam ba ki la shim bad pynthikna ka jingïatreilang bad ki rynsan Sorkar kum ka Sahyog hapoh ka MHA – I4C (Indian Cybercrime Coordination Centre, ka tnad Kam Pohïing).
Ka jingïatreilang hapdeng ki kynhun. Ka Indian Cybercrime Coordination Centre, hapoh ka tnad Kam Pohïing ka long ka jaka pdeng na ka bynta ki jingujor NCII bad ka pynïaid ïa ka NCII hash bank kaba shngaiñ.
Ka tnad Telecommunications: Ka ïatreilang bad ki Internet Service Provider ban block ïa ki URL. MeitY: Ka peit ïa ka jingbud ryntih bad ka ïatreilang bad kito kiba don bynta ha kane ka kam bad ruh kiwei kiwei ki bynta jong ka Sorkar kiba don bynta ha kane ka kam.
Ka jingpynkupbor ïa ki lanot bad ka jingpynkhlaiñ ïa ka jingshngaiñ ha ki kam digital
Kane ka SoP ka dei ka sienjam kaba heh ban pynkupbor ïa ki briew, khamtam ïa ki kynthei, ban ïoh biang ïa ka bor ha ka kam digital jong ki bad ban pynthikna ïa ka jinglong jingman online kaba shngaiñ. Ka pynskhem ruh ïa ka jingkut jingmut jong ka sorkar ban ïada ïa ka jinglong kyrpang, ka burom bad ka jingshngaiñ ha ka kam cyber.
