Shillong, Nohprah, 06: Ka Sorkar Jylla ha ka jingpynbna ba la pynmih paidbah, ka la hukum ban pynkha ïa ka Police Outpost ba thymmai ha ka shnong Barato, West Jaiñtia Hills ka ban tip kum ka Barato Police Outpost. Ïa kane la pyntip da u Secretary ka Tnad Home (Police) ka Sorkar Jylla.
Ka Barato Police Outpost la ker da ka Saitsama Out Post na shaphang shatei, ka Jowai Police Station sha mihngi, ka Raliang Out Post na Shathei bad ka Nartiang PIC na Sepngi.
Kum ban shu pynkynmaw dang shen, ka Sorkar Jylla ka la rai ban pynkha ïa ki Border Outpost ha ki 7 tylli ki jaka khappud jong ka Jylla Meghalaya bad ka Jylla Assam. Kane ka la mih hadien ka jingshah siat ïap jong ki san ngut ki paidbah ka shnong Mukroh ha ki Pulit ka jylla Assam bad ki Forest Guard ha ka 22 tarik u Naiwieng.
Hadien ba ka Sorkar Jylla ka la pynbna ban pynkha ïa ki 7 tylli ki Border Out Post ha ki jaka khappud, ki sengbhalang bad ki paidbah nongshong shnong jong ka Shnong Mukroh ki la dawa ïa ka Sorkar ban buh ïa ka Border Out Post ha ka shnong Mukroh ym ha ka shnong Barato halor ka nongrim ba ka shnong Mukroh ka dei kaba dang hap hapoh ka West Jaiñtia Hills District.
Ki shnong kiba hap ha kane ka Police Outpost ba thymmai ki kynthup ïa ka Barato, Mukroh, Saba, Maitdien, Jongkynshur, Iongkwang, Thangrain, Khliehsniriang, Shiliangmyntang, Thadsning, Thad Ïalong, Musiaw, Samatan, Moobandu, Latymphu, Thadbamon, Umsalang, Lummuriap, Sowkhlieh bad ka Bhaiñ.
Da ka jingpynkha ïa ka Barato Police Outpost, baroh ki jaka kiba la pynhap ha kane ka Outpost kin ym hap shuh ha ka Nartiang Police Station.
