Nongstoiñ, Naiwieng 03: Ka District Magistrate Eastern West Khasi Hills Mairang, lyngba ka kyndon aiñ 163 BNSS 2023, ka la pynmih ïa ka hukum ban khang ïa baroh ki par maw beaiñ kiba pyntreikam khlem da ïoh jingbit na ki bor ba dei khmih kiba don ha ka shnong Markham (Riat Mawleiñ) bad Urkohngoi.
La pynmih ïa kane ka hukum, hadien ka jingïoh jingtip ba ka don ka jingpyntreikam ïa ki par maw ne quarry khlem da ïoh jingbit ha ki bynta ka shnong Markham village (Riat Mawleiñ) bad Urkohngoi.
Kane ka la pynthut ïa ki paidbah bad ka buh jingma ruh ïa ka jingim jong ki nongshong shnong, ka pynjot ïa ka mariang bad ka long ruh shi bynta ka jingpynkheiñ ïa ka aiñ ïada mariang.
Lada lap ïa kino kino kiba ïaleh pyrshah bad pynkheiñ ïa kane ka kyndon aiñ kin ngat ha ka jingshah pynshitom kat kum ka aiñ. Kane ka aiñ kan treikam naduh mynta tad haduh ban da pynbna da kumwei pat.
