Pynlut kai ka sorkar ïa ka pisa, katba ïa ki nurse pat la 2 bnai khlem siew tulop: VPP

Shillong, K’ Lyngkot 12: Ka seng saiñ hima ka Voice of the People Party ka la pynpaw ïa ka jingkyndit bad sngewphylla ban tip ba ki 288 ngut ki Contractual Staff Nurses kiba trei hapoh ka sorkar Meghalaya kim pat ïoh ïa ki tulup jong ki na ka bynta ki 2 bnai, kata u Naiwieng bad u Nohprah 2025.
Ka jingbym pyllait ïa ki tulop jong ki ka la buh ka jingim bad ki longïing longsem hapoh ki jingeh bakhraw. Nalor ka jingrakhe ïa ka Christmas bad ka New Year khlem ka pisa, ki nongtrei ki la mad da ki jingeh ban kynduh ïa ki jinglut haba ïadei bad ka jinglut ha ka pule puthi jong ki khun ki kti jong ki kum ka jingsiew ïa ki bai skul, ban thied ïa ki kot bad ki uniform.
Ka sorkar kam dei ban klet ba kine ki nurse ki hap ruh ban pyndap ban ïalade bad ki longïing jong ki. Ka lonr kaba sngewkhia shibun bad kaba dei ban pynrem ba ki nongtrei kiba shakri ïa ki para nongshong shnong ki dei kiba la shah eh bad shah pyntyrkhong ha ka sorkar.
Kadei halor kane ba ka VPP ka la dep ai jingmut bad ai buit ïa ka sorkar ban kiar na ki jingpynlut kai ïa ka pisa hynrei ban leh ïa ki jingdonkam ki nongrim jong ka sorkar.
Ka Party namar kata ka dawa ba ka sorkar ka dei ban sam noh ïa ki tulop jong kine ki contractual nurse mardor, ong ka kyrwoh na u Bah B. Myrboh, nongaiktien ka VPP.