Pynlong Workshop ka tnat Basin EJHD ban kyntiew ïa ki IVCS jong ki Co-operative Society ha ki shnong

Khliehriat nohprah 13: Ka tnat District Basin Development Unit jong ka East Jaiñtia Hills District hynin ka sngi ka la pynlong ïa ka workshop ba kyrpang ha conference hall ha ophis u Deputy Commissioner ha Khliehriat, kane ka workshop jong ki dkhot ka ICVS ka long ban ïa phylliewjingmut lang halor kumno ban kyntiew ïa ki ICVS kiba don ha ki shnong, hapoh East Jaiñtia Hills District ki la doh haduh ar pgew lai tylli ki ICVS ha ki shnong bapher bapher.
Ka Ïengskhem IVCS jong ka shnong Moolang, ka dei kaba la lah ban kynjoh sha ka 100 percent ka jingwan rung dkhot ki nongshnong shnong sha ka IVCS, katkum ka jingiathuh ka Assistant Secretary IVCS jong ka shnong Moolang, ka kong Gracefull Shylla, ka la ong ba ha shnong Moolang ki doh 444 tylli ki long iïng bad baroh kitei ki longiïng ki la rung dkhot sha ka ICVS,, don kiba thep pisa 50 tyngka, 100 tyngka, 500 tyngka, 1000 tyngka sha ka Co-operative Society jong ka ICVS kumnka jing kynshew pisa bad kane ka wanrah jingmyntoi shibun bha ïa ki nongshong shnong, ha kaba la bun sien ka Co-operative Society jong ka Moolang lyngba ka Ïengskhem IVCS ka la ai pisa ram sha ki nongshong shnong.
Shuh shuh, ka kong Gracefull Shylla, ka la ïathuh ba ka Society ka ju pynlong ïew ruh shi sien shi taïew ha shnong Moolang, ha kane ka ïew la die ïa ki jhur, ki doh, ki slipar, ki juti bad lada don napdeng ki dkhot Producer Group (PG) kiba ju wan ban thied tista na kane ka kiew ka Society ka ju ai ïa jingmyntoi katto katne percent ïa ki, la ong ruh ba Society (IVCS) ha shnong Moolang ka kiew bha ha kaba ka kong Bethelieid Shylla ka bat kum ka President bad ka Bhabi Dkhar kum ka Secretary.
Ka Deputy Manager Rural Finance, kaba dei ruh na ka District Project Management Unit East Jaiñtia Hills District, ka kong Rimika Lalang, ka la pynshai sha ki dkhot jong ki IVCS kiba la wan sha kane ka workshop bad ong ba ka East Jaiñtia Hills District, ka dei ka district kaba bun bha ki kynthei kiba kynshew pisa kum ha ki Recurring Deposit bad ha ki saving, la ong ruh ba ka jingthmu jong kine ki IVCS bad ki Co-operative Society ka long ban kyntiew ïa ki kynthei namar bunsien ki kynthei ha ki jaka shnong kyndong kim lah ban wan khah khah sha ki jaka sor ban thep pisa ha ki bank, hynrei da ka jingdon kine ki society, ki IVCS ki la ïarap shibun ïa ki ban kynshew pisa, ym tang katta, kine ki Co-operative Society ki ju iarap ruh ïa ki nongshong shnong kiba dei ki dkhot IVCS da kaba ai ram (loan) ïa ki ha ki por ba ki donkam kyrkieh, namar ban leit pan ram na ki bank bunsien ki shem jingeh ha kaba pynbit pynbiang ïa ki kot donkam, hynrei kine ki Society ki kham pynsuk ïa ki ha kaba ïoh ram pisa.
Kumjuh ruh na ka liang u Assistant Manager INRM-DBDU East Jaiñtia Hills District, u bah Leiky Sanio,u kyntu bad pynshlur ïa ki paidbah nongshnong shnong ba kin rung dkhot sha ki IVCS jong ki Society kiba don ha ki shnong ban shim ïa kine kum ki Institution lane ki shlem ai jingiarap, u kyntu ruh ïa kito kiba la long dkhot ba kin sngewbha ban ai jingpynshai lem ïa kiwei pat halor ki IVCS ki ban wanrah jingmyntoi ïa ki nongshongshnong ki ban kyntiew ïa ki ha ka ïoh ka kot bad ha ka sengkam seng jam lyngba ka jingia kynshew pisa lang jong ki dkhot.
Ha kane ka sngi, na ka liang ka ophis DBDU East Jaiñtia Hills District, ka la ai ruh ïa ki khusnam bad ki syrnot sha ki 23 ngut ki dkhot IVCS kiba la trei radbah na ka bynta ki Society ba kynthup ruh ka Iengskhem IVCS Moolang, kaba la ïoh kum ka Best Performance, ïa ka best Secretary la ai sha ka Secretary IVCS Sohkymphor, ka kong Jialcy.M.Langstang, Best Book Keeping Record la ai sha u Secretary IVCS Jalyiah, u bah Vikram Dkhar.Ia ki syrnot la sam da u Deputy Commissioner East Jaiñtia Hills District, u Abhilash Banarwal, IAS bad u District Project Manager DBDU East Jaiñtia Hills District, u bah Hunlang Blah.