Jowai, Nailur 04: Ka ophis District Commerce & Industrial Centre, West Jaiñtia Hills, Jowai kala pynlong ïa ka District Level workshop halor ka skim Uttar Poorva Transformative Industrialisation (UNNATI), 2024 kaba la long mynta ka sngi Palei ha Conference Hall jong katei ka ophis, shi bynta ban pynsngewthuh ïa ki nongsengkam la jong lyngba ki jingmyntoi kiba lah ban ïoh na ka skim UNNATI.
Ka jingthmu jong kane ka prokram ka long ban ai jinghikai ba kham bniah ïa ki nongsengkam, kumjuh ka rukom pynïaid ïaka kam bad kumjuh haka liang ka pisa pilaiñ, la kyntu ruh ïa ki kino kino ki kynhun kiba kwah ban ïoh jingmyntoi na kane ka skim ki dei ban wan shakhmat.
Ha kane ka sngi la wan ban shim bynta naduh ki nongtrei jong ka tnad sorkar, ki nonghikai na ki jaka pule, ki nongïalam shnong bad ki nongsengkam la jong napoh kane ka thaiñ ban ïa phylliew jingmut lang na ka bynta ban wanrah ïa ki jingmut ba thymmai bad ban pynkiew ïa ka kam ka jam.
Ha ka jingkren pdiang na ka liang u bah B.Warjri, General Manager, DCIC, Jowai ula pynsngew ha kane ka workshop yn ïoh shibun ki lad jingtip kiba pher bapher, da kaba ong ruh ba ka West Jaiñtia Hills ka dei kaba riewspah bha ha ka riti ka dustur bad ka spah mariang, kane ka long ka lad ban pynkiew shuh shuh ïa ki samla, ki longkmie bad ki nongsengkam.
Ula ong lyngba kane ka prokram kan long kum ka rynsan ban ïoh ïa ki jingtip ba bniah hapdeng ki nongseng kam bad ka tnad (agencies) jong ka sorkar lyngba kane ka kan ïarap ban pynkiew ruh ïa ka West Jaiñtia Hills District bad ka jylla hi baroh kawei.
U bah Badonlang Warjri, PIU na ka DPIIT (Department for Promotion of Industry and Internal Trade) ula kren shaphang kane ka skim UNNATI, kawei na ki lad kaba hakhmat eh ban pynkiew ïaka tnaiñ Northeast, naduh ka jingïohkam ïoh jam jong ki khun samla trei ri bad ki kam pynroi jong ki sap tynrai. Da kaba ai nuksa ïa ka jingtreikam PepsiCo bottling plant ha North Garo Hills, kane ka plant kala ïarap ban pynïoh kam bad ban ai ki lad jinghikai.
Na ka T.10,037 klur, la mang na ka bynta ban pynsngewthuh paidbah, naduh ki prokram bad lyngba ki lad pathai khubor. Ka jingpynshlur ïa ki karkhana ban pynrung kyrteng hapoh ka skhim, ha kaba ïa ka pisa la ai ha ki ar bynta, kaba nyngkong ka kynthup ïa 60% na ka jingmang bad kaba sah la pyllait katkum ka FIFO (First in first out), ong bah Warjri.
Naka liang u ma Kmen Lato, uwei na ki nongsengkam kharkhana napoh ka Jaiñtia Hills naduh u snem 1986, ula pashet jingmut ïa ka jingïaid lynti ban wanrah ïa ki kharkhana sha kane ka thaiñ, ula pynngew ba ka jingseng kharkhana mynta ka lah ban poi na ka T.50 lakhs haduh T.250 klur tyngka bad kane ka urlong lyngba ka jingtrei shitom bad ka jingtrei hok ïa ka kam. U la kdew ruh ïa ka jingheh jong ka khaïi pateng lyngba ka Act East Policy da kaba pyndonkam ïa ka kad liengsuiñ kaba don ha Dawki ban pynïasoh ïa ka Southeast Asia bad shabar kumjuh.
Shuh shuh u ma Lato ula kren halor ka jingdon ka Durga Temple ha ka shnong Nartiang, kumta la donkam ban pynbha pynmiat ïa ki sawdon sawkun jong ka, khnang ba kan long kum kawei na ki jaka jngoh kai pyrthei kaba ïarap ban pynkiew ïa ka ïohkam ïohjam.
Ha ka por ba ai jinghikai (session) u bah Badonlang Warjri, PIU ula batai halor ka UNNATI Scheme, ka kong S.K. Challam, Inspector of Taxes, Taxation Department ka sorkar jylla kala batai halor ka GST compliance, u bah B. Kharkongor BDR, NEDFI bad u bah S. P Gangte, AGM Small Industries Development Bank of India kila batai halor ka Financial Assistance to MSME, katba ka kong E. Shylla, MSPCB kala batai halor ka Regulatory activities jong ka MSPCB.
Ha kane ka prokram la pynïaid da Vino Syngkon, katba ïa ki kyntien ai khublei la ïoh na u ma S. Pale, Industrial Promotion Officer DIC, Jowai.
