Pynlong rally ka shnong Tongseng-Narpuh ban pynrem ïa ki kam pynïap briew u Ramesh Dkhar

0

Khliehriat Nailur 8 : Ka Dorbar Shnong Tongseng Narpuh, East Jaiñtia Hills District, ha ryngkat ka jingïa shim bynta lang baroh ki nongshnong shnong lem bad ki dkhot sengbhalang, mynta ka sngi ki la pynlong ïa ka jingïaid rally ne ka jingïaid paidbah hapoh shnong kum ka Dak ka jingpynrem bad pyrshah jur ïa ki kam runar jong u Ramesh Dkhar uba la don kti ha kaba pyniap dusmon ïa ki ar ngut ki nongñiah kali tourist taxi bad uba la pyniap dusmon ruh ïa kawei ka longkmie ha shnong Tongseng ha u bnai lber jong u snem 2020.
Ka kmie jong utei u Ramesh Dkhar, ka kong Mela Dkhar ruh ka la wan ban ïa snoh kti lang ha kane ka jingïaid paidbah bad haba kren ha ka jingïalang ba lyngkot, ka la ong ba ma ka ruh watla ka dei ka kmie hynrei ka mynsiem jongka ka dap da ka jingtieng bad jingsyier lada ki bor ka aiñ ki pyllait ne ai jamin ïa u khun jong ka u Ramesh Dkhar “Lada lait u Ramesh un pyniap shwa ïa nga, hooid u dei u khun jong nga tangba mynta nga sngew ba ngam dei khun shuh ïa u, u don ka dur te ka dur briew katba ka mynsiem pat ka mynsiem ksuid, te katba ka shah ka aiñ, lada shu phasi noh ruh biang bad lada set patok ïa u ruh dei ban set baroh shi jingim namar lada pyllait ïa u nga tieng ïoh nga ïap” ha kajuh ka por katei ka longkmie ka ai ka jingkhublei sngew nguh bad sngew burom ïa ki bor shnong jong ka shnong Tongseng kiba la shim lem ïa ka jingkit jong ka bad peit lem ïa kane ka kam bad sngewthuh lem ïa ki jingeh jingjynjar jong ka.
U Waheh Shnong jong ka shnong Tongseng, u ma Chewanbiang Rymbai, u la kyntu ïa ki bor ka aiñ ba kin shim khia ha kane ka kam bad dawa ruh ba dei ban kset patok ne set along noh shirta jingim ïa u Ramesh Dkhar bad ïa kiwei kiwei ki nong pynïap briew “Dei ban shu set along haduh ba un da tymmen, haduh ba un da kdor ki kjat haduh ba um lah shuh ban leh ïa ki kam bymman bad lada shah ka aiñ lah dei ban shu phasi noh ïa u.
U Waheh Shnong, u la pynkynmaw ruh ba ha ka 22 tarik u lber 2020 utei u Ramesh Dkhar u la pynïap dusmon ruh ïa kawei ka longkmie kaba tip kyrteng kum ka kong (L) Kranti Sutnga, kaba na shnong Tongseng hi, ha kaba u la tan ïa ka sha kawei ka jaka khlaw bad dung da ka tari na met na kpoh bad na kiba bun ki bynta jong ka met haduh ba kan da ïap, hadien kane ka jingjia na ka liang ka Dorbar Shnong ka la dep buh da ka jingthoh sha ki bor jong ka aiñ bad dawa ba dei ban kset patok ïa u shi jingim, hynrei ka Dorbar Shnong ka sngew lyngnoh pat ba tang hapoh shisnem utei u runar u la ïoh jamin bad lait na patok, la ïathuh ruh ba na ka liang ka Dorbar Shnong naduh katei ka por ka la kyntait shnong noh ïa utei u runar bad bthah ruh ïa kiba ha ïing ha sem ba kim dei satia ban shah ïa u Ramesh Dkhar ba un wan sha shnong, shuh shuh hadien ba la paw ha ki pathai khubor ba u Ramesh u don kti ruh ha kaba pynïap dusmon ïa ki ar ngut ki nongñiah kali kiba na ri lum Jaiñtia, kane ka la nang pynbitar shuh shuh ïa ka shnong, namar kine ki kam runar jong u ki pynjah burom ïa ka shnong ka thaw, ïa ka kur ka jait bad buh jingma bad jingsyier ruh ïa ka shnong ka thaw, ïa ka imlang ka sahlang baroh kawei, kumta ki la pynlong syndon da kane ka rally kum ka dak ban pyrshah jur ïa ki kam runar jong u bad dawa ruh da ka shnong ban shu phasi ne ban set patok noh shi jingim.
Kumjuh ruh u Secretary Shnong Tongseng, u bah Saman Phñiaw, u la ïathuh ba naduh kito ki por ba u Ramesh Dkhar u pyniap dusmon ïa ka kong (L) Kranti Sutnga ha u snem 2020, na ka liang ka Dorbar Shnong, ha ryngkat ki kur ki jait jong u ki la ïakren bad soi ïa ka jingthoh ba la buh hakhmat ka aiñ kaba dawa ba dei ban set patok noh shi jingim ïa u Ramesh Dkhar, namar lada pyllait ïa u kam nym don shuh ka shnongsuk, shong shngaiñ ha shnong ha thaw bad ha ka imlang ka sahlang.
Na ka liang u President jong ka Khasi Students Union, Tongseng Unit, u samla Wombisat Shylla bad u dkhot jong ka East Jaiñtia National Council, u bah Eveningson Swer, ki la dawa jur na ki bor jong ka aiñ ba ka aiñ ka dei ban pynshitom ïa u Ramesh Dkhar da kaba shu phasi lane set patok shi jingim, namar lada ka aiñ ka pyllait ïa u un sa bam shuh shuh ïa ki mynsiem briew bad wanrah jingtieng jingsyier ha shnong ha thaw bad ha ka imlang ka sahlang.
Ki paidbah jong ka shnong Tongseng Narpuh, kynthei bad shynrang, naduh ki tymmen, ki rangbah, ki khynnah, ki samla lem bad ki dkhot ka KSU bad EJNC, ki la rah ïa ki placard, kiba la thoh pyrshah ïa ki kam bymman jong ki nongpyniap briew, kiba la dawa na ki bor ka aiñ ban phasi , ban set patok shi jingim, ki la rah ruh ïa ki lama ïong kum ka dak ka jingpyrshah ïa ki kam runar u Ramesh Dkhar, ki la pyrta jam ïa ki jingdawa jong ki bad ka placard ba la rah da ka kong Mela Dkhar kaba dei ka kmie jong u runar, u Ramesh Dkhar ka thoh “Set Patok shi jingim ïa ki nongpyniap briew”

Leave A Reply

Your email address will not be published.