Pynlong rally ka AJCVA , ha Jowai kum ka dak ka jingpyshah jur ïa ki runar pynïap briew

Jowai 01 Nailur : Kum ka dak ka jingpynrem bad jingpyrshah jur ïa ki runar kiba pyniap dusmon ïa ki ar ngut ki nongñiah kali torist kiba na ri lum Jaiñtia, ka All Jaiñtia Commercial Vehicle Association (AJCVA), ha ryngkat ka jingïasnoh kti lang ki sengbhalang na ri lum Jaiñtia, ka Synjuk ki Waheh Shnong Jowai lem bad kiba ha ïing hasem jong ki nongñiah kali kamai kiba shah pyniap mynta ka sngi ki la pynlong da ka rally bad ka ïaid paidbah ha sor bah Jowai.
Ia ka jingïaid paidbah la sdang naduh jan ka Wah Gate najan ïewmusiang Jowai shaduh lad Kiang Nangbah Government College, Jowai.
Ki nongkren kiba la ai jingkren ha kane ka jingïalang ki la pynsawa ïa ka sur jong u paidbah bad ong ba ki bor jong ka aiñ ki dei ban shu rai pynrem bad shu phasi noh ïa ki runar kiba la ïoh kem kiba donkti ha kaba pyniap dusmon ïa ki ar ngut ki nongñiah kali
U President jong ka AJCVA, u bah Paila Kordor Lyngkot, u la ban jur ïaki bor jong ka aiñ ba ki dei ban pynshitom ïa kine ki runar kat kum ka kam runar ba shyrkhei jong ki bad ba ym dei satia ban ai janmin ne pyllait ïa ki, hynrei dei ban shu rai pynrem ïa ki shi syndon da kaba sdien phasi ne set along shyrta ka jingim jong ki, lym kumta kum kine ki jingjia ba buh jingsyier ïa ka im lang ka sahlang kin nangjur shuh shuh hapoh kane ka thaiñ bad ka ri baroh kawei.
La ong ruh ba lada don kino kino kiba haiïng ha sem ne ki paralok jong ki, kiba donkti ban bah jamin, ïa kum kine ruh dei ban kynnoh lang ba ki dei kiba donkti ha kajuh kaba kum kane ka kam runar, ka sur na ki nongkren ka mih bad dawa ïa ki bor sorkar ne ki bor jong ka aiñ ba da lei lei ruh ym dei shuh ban ai jamin ïa kitei ki runar ba la iohkem.
Kum ban shu phai dien biang, u (L) Damehipay Papeng u ba na ka shnong Khongshnong uba shongkha ha shnong Mhmyntdu WJHD, u la jah rngai naduh ka 10.08.2022 bad la lap ïa ka met iap jong u ha ka 24.08.2022, na ka jaka khlaw kaba harud ka surok Jowai Bypass, katba ïa ka met jong u (L) Fullmoon Kharsahnoh uba na ka shnong Larnai WJHD, uba kamai torist taxi na Jowai- Shillong uba la jah rngai ha ka 16.08.2022 la lap ïa ka met jong u ha katei ka juh hi ka sngi na Mynkre East Jaiñtia Hills District, na ka jaka khlaw kaba don hajan Amrit Cement.
Kane ka jingjia shisha ka la pynpar niangkhriat ïa ka im lang ka sah lang baroh kawei bad da ka jingtrei shitom ki bor pulit jong ka East bad West Jaiñtia Hills District, la ïoh ban kem noh saw ngut kiba donkti ha kaba pyniap dusmon ïa kitei ki nongñiah kali, kat haduh mynta kiba la shah kem bad ngat ha ki kyndon ka aiñ ki kynthup u I Love You Talang uba dei ruh u runar ba radbah jong ka kynhun, u Sampher Ksoo, u Tell-me Pyrtuh u bala tip ruh kum u Bormi bad u Ramesh Dkhar, kine mynta ki don ha kti jong ka aiñ bad ka jingtohkit ïa ki ka dang ïaid.
Kiba la ai jingkren ha ka jingïalang ki kynthup ruh u General Secretary jong ka AHPUF u bah Chandame Sungoh, u President Synjuk Waheh Shnong Jowai, u bah Alan Niangti, u General Secretary Jaiñtia Students Union, u bah Treior Suchen, kiba ha ïing kiba na ka liang u (L) Damehipaya Papeng bad kiba na ka liang u (L) Fullmoon Kharsahoh bad kiwei kiwei.