Khliehriat, Jymmang 21: Ka ophis jong ka Meghalaya Biodiversity Board (MBB) jong ka Sorkar Jylla ha ryngkat ka jingïatreilang bad ka Bataw Biodiversity Management Committee(BBMC), hynnin ka sngi ka la pynlong ïa ka prokram thung dieng ha shnong Bataw, East Jaiñtia Hills District, kane ka prokram ka long ruh kum shi bynta ka jingrakhe ïa ka sngi kyrpang ka mariang ka International Day for Biological Diversity(IDB).
Ha kane ka sngi la pynlong ruh ïa ka prokram ai jingpynshai ne ka awareness prokram ha kaba ïadei bad ka jingpynneh pynsah ïa ka mariang kaba kup rong jyrngam.
Ha ka jingïalang la shim ruh ïa ka rai ban pynkhuid ïa ki wah kiba don hapoh shnong Bataw bad yn pynkhuid nyngkong shwa ïa ka Wah Laje kaba dei ka wah ba don bun ki doh um kum ki dohthli, ki shymprong bad kumta ter ter bad ïa kane yn leh ruh da ka jingïatreilang bad ki bor shnong jong ka shnong Bataw.
Haba kren ha ka jingïalang, ka wei na ki nongtreimon sngewbha, ka kong Kerlinda Kharmalki ka la ong ba ka Sorkar lyngba ka tnad Meghalaya Biodiversity Board ka la dep thaw kumba 6485 tylli ki Biodiversity Management Committee hapoh ka jylla Meghalaya bad ka don ruh ka jingangnud ba kane ka Bataw Biodiversity Management Committee (BBMC) kan long kawei ka nuksa kaba bha hapoh ka District, namar ka shnong Bataw ka don ka spah mariang ha ki liang baroh bad ka long kaba donkam ban tyngkai ïa ka spah mariang bad ïa ka mariang namar kan wanrah ka jingkyrkhu ïa ka lawei ka ban wan.
Ka Project Assistant, ka kong Pyndaplin Lyngdoh ka la ong ba ïa mynta hi donkam ban pynkhreh ïa ka People Biodiversity Register (PBR) khnang ban dup lah ban buh beit buh ryntih ïa ki jingdon jingem ka Shnong Bataw, kata ha ki liang bapher bapher ba kynthup naduh ki jingim kiba don hapoh um bad ki mrad mreng ba don ha khlaw ba kynthup ki mrad, ki sim ki doh bad ki jingthung jingtep kiba mih ha ka mariang, ki jingthung kiba long ban shna dawai kynbat khasi ban sumar ïa ki jingpang ba bun jait bad ïa kane ka kam yn leh bad yn pynbit pynbiang da ka Bataw Biodiversity Management Committee ha ryngkat ka jingïatreilang bad ka Meghalaya Biodiversity Board.
Ha dien ka jingïalang la pynlong ïa ka jingthung dieng hapoh phyllaw ka Dorbar Hall ha ka dong Umlatyap ha shnong Bataw ha kaba la lam khmat da u Waheh Shnong Bataw, u bah Deihok Sumer bad la ïa shim bynta lang da kiwei kiwei kiba kynthup naduh ki dkhot jong ka ka Bataw Biodiversity Management Committee.
Hadien ka jingïalang u dkhot jong ka Biodiversity Management Committee, u bah Macdonald Suchiang u la sam ïa ki tynrai dieng sha ki khyndai tylli ki dong kiba kynthup ki tynrai dieng Sohphie, ki dieng Cherry, ki dieng sla Tyrpad bad kiwei kiwei ba ki nongshong shnong kin ioh ban thung ha ki dong ba ki sah.
U Chairman jong ka BBMC, uba dei ruh u Waheh Shnong Bataw, u bah Deihok Sumer u la ong ba ka Committee kan iai buddien ïa kane ka jingthung dieng ha shnong khnang ba ki tynrai dieng ki im kin san.
Ïa ka jingïalang la pynïaid da u Waheh Shnong Bataw u Deihok Sumer uba long ruh u Chairman ka Bataw BMC ha ka jingïadonlang u Secretary jong ka Shnong Bataw u bah Nehlang Suchiang, ki nongkitkam bad ki Dkhot jong ka Bataw BMC lem bad kiba la shah khot sngewbha.
U waheh shnong Bataw u la pynskhem ïa ki Rangbah Dong bad ki Secretary dong jong ki khyndai tylli ki Dong ki ban long ruh kum ki Co-Opted Members jong ka Bataw BMC khnang ban pynkhlaiñ ïa ka jingtreikam ka BBMC hapoh shnong.
