Nongpoh, Jylliew 18: Ka Balang U Blei, Meghalaya bad Assam mynta ka sngi kala pynlong da ka prokram thung dieng ba kyrpang ha kawei ka shlem ai jingkyrmen ïa kito ki briew kiba ju kyrni bad ngop haki jingdih ba sniew bala tip kum ka Jingaiei Rehabilitation Centre kaba dang ïaid shaid shaid ïaka jingshna ban pyndep naka bynta ka jingmyntoi haka imlang ka sahlang, da ka jingthmu ban pynjyrngam ïaki sawdong sawkun jong ka ban long ruh ka jingkyrmen ïaka mei mariang.
La wan ruh ban shimbynta ha katei ka jingthungdieng da ki Pastor jong ka Balang kiba kynthup naduh u Rev K Nongpluh uba dei ruh u President jong ka Pastors’ Fellowship, U Rev. R Imiong uba dei u Secretary ka Bussiness Association, u Rev AM Mihsil, u Rev SK Syiemlieh uba dei u secretary ka Pastors’ Fellowship, u Rev M Shangpliang, u Rev AR Marwein bad kiwei kiwei ki dkhot jong kane ka Jingaiei Centre, haka jingdon lang u MLA ka Umsning Constituency u Bah Jason Sawkmie Mawlong, u Bah S Mawlong uba dei u Range Forest Officer, ki riew rangbah bad ki Longkmie.
Kum ban shu pynpaw ba katei ka Church of God Rehabilitation Centre kaba don ha Syad Rit ha Ri-Bhoi District ka dei ka Project jong ka Church of God Business Association ïa kaba la thmu ban buh kum ka jaka ban ai jinghikai bad pynwandur biang ïaka jingim jong kito ki paralok kiba la kyrni haki jingsniew ki kam pyrthei kiba la ngop ha kiba bun ki jingsniew bad kumta ter ter, lyngba jong kane ka Rehabilitation Centre ka Balang ka don ka jingkyrmen ba kan dang lah ban ïalam ïaki khun bad ki mynsiem jong u Blei sha ka jingim kaba ka imlang sahlang ka pdiang ïaki sa shisien.
Haba kren ha katei ka sngi naka liang kitei ki nongïalam Balang kila pynpaw ba kumba katei ka shlem ka dei kaba ai jingkyrmen ïaki khun samla kiba la ngop haki dih ba sniew, katei ka jingthung dieng kan long ruh ka jingkyrmen ïaka mei mariang kaba la sdang ban syllen bad bun naki jingthaw ba im kila sdang ban duhjait noh na kane ka sla pyrthei namar ka jingdusmon u bynriew.
Naka liang u Bah Jason Sawkmie Mawlong MLA ka Umsning haba kren ha katei ka sngi u la pynpaw ka jingsngewkmen kaba khraw halor ka sienjan baka Balang u Blei kala shim ban pynjyrngam ïaki sawdon sawkun jong katei ka Rehabilitation Centre kaba dang shna shaid shaid ban pyndep bad plie noh ïaka bad kane ka long ka nuksa kaba bha ba ka balang kala shim naka bynta ka jingkyrmen ïaka mei mariang bad kumjuh ruh ïaki khun samla hadien bala pyndep ïa katei ka shlem ai jingkyrmen.
