Pynlong prokram kyrpang ka RBI , ka FLFLE ha Nongtalang College West Jaiñtia Hills

Khliehriat Lber 27: Ka Reserve Bank of India (RBI) mynta ka sngi ka la pynlong ïa ka prokram ba kyrpang, ka Field Level Financial Literacy Event (FLFLE) ha Nongtalang College, Nongtalang, West Jaiñtia Hills District, kane ka long shibynta kum ka jingpynshai paidbah ha kaba iadei bad ki kam kiba iadei bad ki pisa tyngka, ïa kane ka prokram la plie da u GM (O-i-C), RBI Shillong, u bah Olden Nongpluh.
Haba kren ha ka jingïalang, u bah O. Nongpluh u la kren halor ka jingdonkam kumno ban pyniaid beit ïa ki pisa ki tyngka lane kata ka Financial Planning, kaba dei ha ka rukom ban pynïaid ïa ki pisa na ka bynta ki jingdonkam ba shi met bad ha kino kino ki kam kiba kyrkieh, u la kren ruh halor ka jingpyndonkam ne pyniaid ïa ka pisa kaba da ki digital financial services bad ong ba watla kane ka digital financial services ka pynsuk bad kam shim satia ïa ka por bad ka ïada ruh na kano kano ka jingshah thok shah shukor ha kino kino ki kam ba ïadei bad ka pisa tyngka.
U Amarjit Behera, uba dei u Regional Manager jong ka SBI, u la ai ka jingiaroh ïa kane ka jingtreikam ka RBI kaba la kyntiew bad pyniaid shaphrang ïa ka jingpshat jingtip sha ki paidbah ha ki kam kiba iadei bad ka pisa tyngka, u la kyntu ruh ïa ki nongtrei kiba trei ha ki bank ba ki dei ban pynshai bad pynsngewthuh ruh ïa ki briew kiba sah ha ki shnong kyndong ruh, kynthup ka KCC, kaba tyrwa ïa ka sut kaba lyngba ka sorkar jylla, ha kajuh ka por u la pynshlur bad ai mynsiem ïa ki khynnah pule ba ki dei ban pynmlien ban pynlang pisa namar ka jingpynlang pisa kaba khyndiat ruh ka long ka jingpynmlien.
U District Development Manager jong ka West Jaiñtia Hills bad ki heh sorkar kiba na Meghalaya Rural Bank ki la ai ka jingiaroh ïa ki paidbah kiba la kiew ha kiba bun ki liang khamtam ha kaba pyndonkam ïa ka Financial Literacy bad ka Digital Banking.
Ki heh kiba na RBI, Shillong ki la batai kham bniah bad ki la pynsngewthuh ïa ki paidbah, ki khynnah skul kiba la ïa wan ban ïa shimbynta ha kane ka prokram kaba iadei bad ka pisa ka tyngka, ha kaba buh thong kumno ban pynlut ïa ki pisa tyngka bad ban shim ïa ki lad jingiada da kaba long phikir bha ïa kino kino ki message kiba poi sha ki emails, ki SMS bad ha ki phone da kaba shah phone ha kino kino ki briew, ne ki company thok kiba dei tang ki kam thok, ki kam shukor suda ha kaba ïadei bad ki pisa tyngka, kiba ju tyrwa ruh kum ki Banking Ombudsman Scheme, Ombudsman Scheme na ka bynta ka NBFCs, Ombudsman Scheme kiba dei ki kam pisa tyngka kiba da ka online ne ka Digital Transactions.
Ha shwa ban sdang ïa kane ka prokram u Principal jong ka Nongtalang College u la ai ka jingkren pdiang burom ïa baroh ki heh jong ki bank kiba la wan sha kane ka prokram kiba na ki bank bapher bapher, ïa ki khynnah pule bad ïa baroh kiba la poi sha kane ka proram Field Level Financial Literacy Event.