Khliehriat Jylliew 01 : Ka Mihmyntdu Community Social Welfare Association (MACSWA) ha ryngkat ka jingiatreilang bad ka ophis jong ka District Social Welfare Officer East Jaiñtia Hill District, hynnin ka sngi ka la pynlong ïa ka prokram bad kyrpang ha shnong Umlawang, East Jaiñtia Hills District, ha kaba la ai jingpynshai halor ka phang kumno ban kyntiew ïa ka koit ka khiah jong ki rangbah bad ki tymmen.
Ka Director jong ka MACWA, ka Dr J.N.Shulai ka la batai bad pynshai halor ka phang ba kumno yn ai jingsumar ïa kito ki briew kiba la rangbah ha ka kyrta bad kiba la tymmen namar ha kum kane ka por, ka la don ka jingkylla naduh ka jinglong ka met ka phad, ka jinglong ha ka jingmut jingpyrkhat, kum ha ka pyrkhat pyrdaiñ.
Ka Dr Shulai, ka la batai ruh halor ki jait jingshitom bapher bapher bad kumno ban sumar, kane ka jingpynshai ka long na ka bynta kito kiba dang khlaiñ ba dang shait kiba dang biang ka kyrta ba kumno kin ai ki jingsumar ïa kito kiba la heh kyrta bad kiba la tymmen, ka la ban jur ba ym dei ban shu dih hi ïa ki dawa da kaba shu thied hi na ki pharmacy, hynrei dei ban da leit pyni sha ki doctor bad ban dih ïa ki dawai kumba bthah da ki doctor.
Na ka bynta ka koit ka khiah ka la ong ba ka long kaba donkam ruh ban leh killan met, ban bam ki jingbam kiba tei, ban thiah ha ka por kaba biang bad ban sum man la ka sngi.
La ong ruh khnang ba ki riew tymmen ki long byrngia, ka long kaba donkam ba kin ïa kynduh para tymmen ba kin ioh ban ïa pynlut ïa ka por ha ki khanatang para ma ki.
U Medical Officer jong ka OST Khliehriat, u Dr J Nongtdu, u la pynshai shuh shuh ba ki briew ha ka por ba ki la rangbah bad tymmen ha ka kyrta, ki donkam ruh ban ioh ïa ka iïng ka sem kaba suk bad ki donkam ka jingieid ruh na ka imlang ka sahlang, haba kren halor kane ka phang u Dr Nongtdu (OST) u la pynpaw ka jingsngew kmen namar ha kane ka ri ka jaitbynriew jong ngi ki ba ha iïng ba ha sem, da ka jingieid, da ka akor ka burom ki ri, ki sumar bad ki peit ïa kiba la tymmen hala ki iïng ki sem bad ym pat ju don ki tymmen ki ban leit thiah sha ka jaka ri tymmen, u la ong ruh ba ki don ki jaka lei kiba ju iaknieh ban ri ïa ki tymmen da ka jingngeit ba lada ri ïa ki kin ïoh ki jingkyrkhu.
U la ai mynsiem ïa ki riew tymmen ba ki dei ban long kiba dap da ka jingkmen jingsngewbha ha ka mynsiem namar kane kan wanrah shuh shuh ïa ka koit ka khiah ha ki.
La ioh ruh ïa ka jingkren kyngkot na u Supervisor jong ka District Social Welfare Organisation, u bah Patrick Dkhar, ha kaba u la batai halor ki jait skim bapher bapher kiba lah ban ioh na ka ophis DSWO East Jaiñtia Hills District, kum ka bai bam tymmen kaba ju ioh shi sien shi jingim na ka bynta kito kiba la kot sha ka 6o snem ki kynthei bad 65 snem kyrta ki shynrang, ki don ruh ki skim kum ki lad ai jingiarap ia kito kiba shah lehbeiñ, kiba shah ban beiñ bad ïa kine ki skim lah ban ioh na ka One Stop Centre bad na kiwei kiwei.
Kiba la ai jingkren ki kynhtup ruh ka ORW-MCSWA, ka kong Milanda Rymbai bad na u Waheh Shnong Umlawang, u bah W.Lyngdoh, ïa ka prokram la pyniaid da ka PM MCSWA ,TI CC Khliehriat, ka kong Renibet Patlong.
Ha kane ka sngi ka la don ka jingsam dawai ei bad ka medical check up kaba ym donkam ban siew pisa bad kane ka la long ka jingmyntoi ïa baroh ki paidbah nongshong shnong jong ka shnong Umlawang.
