Shillong, Rymphang 09 : Na ka bynta ban pynsngewthuh ïa ki khynnah ban kiar na ka jingshongkha khlem pat dei por ka ophis jong ka District Legal Service Authoriti West Khasi Hills ha ka sngi Thohdieng ka la pynlong ïa ka programe ba kyrpang ha Anderson Higher Secondary Scholl Upper New Nongstoiñ. Ha shuwa ban pynlong ïa ka jingpynshai halor katei ka mat la sdang shuwa da ka jingïaid proseshon da ki khynnah skul bad rah ruh da ki placard bad banner ba la thoh ïa ki kyntien kiba kit jingmut kiba ïadei bad ki jingeh kiba mih na ka jingshongkha khlem pat dei por.
Ïa katei ka jingïaid proseshon la sdang na phyllaw jong katei ka skul ha kaba la ïalamkhmat ka kong B. Lyngdoh Thabah kaba la wan ban mihkhmat na ka ophis jong u District Child Protection Officer, u Bah G.J.S. Marngar bad ka kong E. Myrthong kiba dei ki nongsaid aiñ jong ka district Legal Service Authority bad la bud lang da ki spah ngut ki khynnah skul. Katei ka jingïaid proseshon ka la sdang na katei ka jaka bad ïaid lyngba jong ka surok haduh pdeng sor Nongstoiñ bad wanphai biang sha Upper New Nongstoiñ haduh ban da poi hapoh ka skul.
Ha katei ka sngi la pynlong ïa ka jingpynshai ha conference hall jong katei ka skul kaba la pynïaid da u bah G.J.S. Marngar Adcocate jong ka DLSA bad la pdiang sngewbha ïa ki khynnah skul ki nongsaid aiñ ryngkat ka kong B. Lyngdoh Thabah da u babu B.V. Myrthong uba dei u nonghikai jong katei ka skul.
Hadien ka jingpdiang sngewbha la ïoh ïa ka jingpynshai na ka kong B. Lyngdoh Thabah halor ka skhim ba kyrpang ba ka sorkar pdeng ka la pyntreikam na ka bynta ban ïada ïa ki khynnah kiba hapoh ka rta kaba khatphra snem kiba ngat ha ki jingshah thombor ha kiwei pat ki briew ne ha ki bahaïing ha sem, ha shnong ha thaw bad ha ka imlang sahlang kiba lah ban pynhiar kyrdan ïa ka longrynïeng jong kiba shah leh beiñ. Ha kajuh ka por la ïoh ïa ka jingpynshai na ka kong E. Myrthong ALADC halor arta shongkha shong man.
Haba pynshai halor katei ka mat ka kong Myrthong ka la ong ba ka por kaba la biang ban shongkha ka long ba katkum ka aiñ ba la mynjur da ka sorkar ka long khatphra snem na ka bynta ki kynthei katba na ka bynta ki shymrang pat ka long arphewwei snem ka rta. Ka la pynshai ruh ba kino kino ki khynnah shynrang kiba shongkha haba kim pat palat ïa ka arphewei snem bad ka kynthei kaba dang hapoh khatphra snem ka long kaba beaiñ.
Nalor kata ka la pynshai ruh ba lada ki don kino kiba ailad ïa ki shynrang kiba ki bym pat palat ïa ka arphewei snem ba kin ïa shongkha bad ka kynthei ka ba dang hapoh khatphra snem kin ngat ha ka jingpynshitom jong ka aiñ. Nalor kata ka la pynshai ruh ba ka jingshongkha khlem pat dei por ka wanrah ruh ïa kiba bun ki jingeh ha ka longïing longsem bad ka pynduh ruh ïa ka hok ba ki dei ban ïoh khamtam eh ka pynduhnoh ïa ka jingpule. Khatduh eh la ïoh ïa ka jingpynshai na u Bah G.J.S. Marngar halor ki kyndon ba ki bor ka aiñ ki dei ban pynshitom ïa kito kiba pynkheiñ ïa ki aiñ shongkha shong man. U la pynshai ruh ba lada lap ba ki don ki kmie ki kpa ailad ïa ki khun ba kin ïa poi kha khlem pat dei por ki kmie ki kpa ruh kin ngat ha ka jingpynshitom da kaba set phatok bad ki nongpynïathoh ruh lada ki dei ki Pastor ne ki Lyngdoh niam kiba pynïathoh ïa kiba shongkha khlem pat dei por kin ngat ha ka jingpynshitom da kaba shah set phatok katkum ka por ba la buh ha ki kyndon jong ka aiñ.
