Shillong, Jymmang: Ka Department of Social Work PG (M.S.W. ), St. Edmund’s College, Shillong, ka la pynlong ïa ka ‘Rural Camp’ naduh ka 23 tarik u Jymmang haduh ka 28 tarik u Jymmang 2022 ha ka Shnong Riangmang, ,Mairang, Eastern West Khasi Hills. Ka phang pdeng jong ka Rural Camp 2022 ka dei “Matti Ban Sahnam B’la Suhthied Naduh Thymmei. Longdien Kin Sakhi, Kan Phuhphieng Ka Lawei”.
Ki prokram kiba la pynlong ha shnong kum shibynta jong kane ka camp ki kynthup ïa ki Skit kiba ïadei bad ka shongkha khynnah, ka jingmlien ban pyndonkam ïa ki jingdih pynbuaid, ka rep-ka riang ha ryngkat ka rukom pynmih ïa ki marbam mardih bad jingpynjanai ïa ki sap ki phong bad ka rukom seng kam lajong.
Ki lah pynlong ruh ïa ka Building As Learning Aid (BALA) Prokram, ha kaba ka kynhun ki khynnah pule MSW 2nd Semester ki shim bynta ban dro bad ai rong ai rup ban pynitynnad ïa ka kynroh jong ka Anganwadi Centre kum shibynta ban pynlong ia ka kum ka jaka ban ai jingnang jingtip ïa ki khyllung khynnah.
Ka Department of Social Work-PG ka la ïatreilang ryngkat bad ka Adolescent Reproductive and Sexual Health Clinic (ARSHC), Ganesh Das Hospital, Lawmali, Shillong ha ka Awareness Program jong ka Adolescent Health lane ka koit ka khiah jong ki samla lud.
Shuh Shuh, ki lah pyn long ruh ïa ka Workshop “Supporting Youth in Skill Development & Entrepre neurship” lane ka work shop ban ai jingkyrshan ïa ki khun samla ban pynjanai ïa la ki sap ki phong bad ka rukom seng kam lajong, na ka bynta ki khun samla jong ka shnong Riangmang bad ïa kane ka workshop la ïatreilang ryngkat bad ka Meghalaya State Skill Development Society (MSSDS), Government of Meghalaya.
Nalor kata la pynlong ruh ïa ka Health Camp kaba shi sngi ha ryngkat ka jingïatreilang bad ka Nongum Primary Health Centre (PHC), Mairang, Eastern West Khasi Hills District. Ka lah don ruh ka jingïaphylliew jingmut ha ka online Meeting na bynta ka jingsdang ïa ka Secondary School ha Riangmang U.P. School bad u Sub-Divisional Education Officer.
Shuh shuh nalor kitei ki prokram , ki khynnah pule ki la ïoh ruh ïa ka lad ban ïashim bynta ha kiwei ki prokram bapher bapher kum ka Home Visit, ki surveys, ka Participatory Rural Appraisal (P.R.A.), ki prokram ha skul kiba kyntup ïa ki ‘Arts and Crafts’ ,’ki jingkilan met’, ‘jingïathuh khana’, ki ‘Action Songs’, ki Awareness Prokram ha ka Dental Hygiene, ka Handwashing, Proper and Improper Touch, bad ruh ka Cleaning Drive hapoh shnong.
Ha ka sngi pynkut ïa kane ka prokram la pynlong ïa ka Cultural Prokram ban pyni paidbah ïa ka jingriewspah ka kolshor jong ki katto katne ki riewlum na shathie lam mihngi ki ba kynthup ïa ki Khasi, Jaiñtia, Garo, bad ki Naga lyngba ki sur rwai tynrai bad ki jingshad tynrai ha ryngkat ka jingïashimbynta lem bad ki nongshong shnong ka shnong Riangmang.
Ha kine ki hynriew sngi jong ka rural camp, ki paid nongshong shnong naduh ki tymmen ki kro, ki Rangbah, ki Longkmie, ki Samla bad ki hep barit ki la ïashim bynta shitrhem ha ki prokram bapher bapher, kaba la pynlong ïa ka Rural Camp ka ba seisoh bad ka ba jop.
