Pynlong prokram ka NIDM halor ka mat ‘Long term Recovery and Reconstruction Strategies’

Shillong, Jymmang: Ka National Institute of Disaster Management (NIDM), New Delhi Ministry of Home Affairs, Government of India ha ryngkat ka jingïatreilang bad ka Meghalaya State Disaster Management Authority (MSDMA), Shillong ki la pynlong ïa ka prokram aijinghikai halor ki lad jingkhyllie bad ki jingtei pat ka ba neh ne (Long term Recovery and Reconstruction Strategies) ka ba la sdang naduh ka 30 tarik mynta u bnai bad kut ha ka 3 tarik u Jylliew 2022 hapoh Lecture Hall, Meghalaya Administrative Training Institute (MATI), Mawdiangdiang, Shillong.
Ha kane ka sngi plie la ïa don lang ruh u Bah E. Kharmalki, Secretary ka tnat Revenue bad Disaster Management, ka sorkar Meghalaya kum u Kongsan. Ka jingthmu jong kane ka jingai jinghikai ka long ban don ïa ka jingtip ka ba bniah halor ki ba bun ki bynta ki ba ïadei bad ka jingkhyllie bad ka jingtei pat ka ba neh hadien kino kino ki jingjia shah pynjulor ha ki bor jong ka mariang.
Nalor kata kane ka prokram kan pynlong ruh ïa ki nongïashim bynta ba kin sngewthuh halor ki mat bad ki jingeh ki ba ïadei bad kito ki ïing ki ba khapngiah briew bad ki bym shongshngaiñ, ki jingtei pat ïa ki jingduh ïa ki ïing ki sem bad ka kamai kajih kynthup ïa ki lad jingïarap halor ka jingshah ktah ha ka bor pyrkhat pyrdaiñ bad halor kiwei pat ki jingshah ktah ki ba harukom.
Kane ka jingai jinghikai ka long ruh ban khmih halor ki jingtip bad jingtbit jong ki heh sorkar jylla ha ka ban thaw ïa ki lad ki lynti ki ba ïadei bad ki lad aijingïarap bad ban pynleit jingmut halor kumno ban tei pat hadien kine ki jingjia shah pynjulor ha ki bor mariang.
Kham hashwa na ka liang u Dr Amir Ali Khan, Asst. Professor NIDM, New Delhi u la ai ka jingpynshai sha baroh ki nongïashim bynta ha ka ba ïadei bad kane ka prokram.