Khliehriat jylliew 27: Ka ophis jong ka District Social Welfare Officer East Jaiñtia Hills District ha ryngkat ka jingiatreilang bad ka ophis jong u District Medical and Health Officer, Adolescent Health Clinic, Khliehriat, ka Meghalaya State Rural Livelihood Society, lem bad ki Self Help Groups (SHGs), mynta ka sngi ka la pynlong ïa ka prokram ai jingpynshai (awareness prokram) ha Dong Wahshnong L.P School, ha Rymbai, ha kane ka prokram la ai jingpynshai halor ki jingsniew kiba mih na u drok bad kumjuh ruh ka jing wan poi ki drok kaba buh jingma ïa ka imlang ka sahlang.
Haba kren ha ka jingïalang, ka District Social Welfare Officer East Jaiñtia Hills District, ka kong R.Pasah ka la ong ba ïa kane ka prokram la ju pynlong ha ka pyrthei baroh kawei man la u snem ha ka 26 tarik u jylliew kaba ïalap ïa ka jingsniew u drok bad kaba pyrshah ïa ka jingkhaiï drok, kane ka sngi bad ka taïew ka long kaba donkam ban pynbun ïa ki prokram ai ai jingpynshai halor u drok.
Ka kong Pasah, ka la ong ruh ba ka jingkiew kiba pyndonkam ïa u drok ka dei namar ba ki don kiba khaiï beaiñ ïa u drok, kumta la dei ban pynkhlaiñ bha ïa ki awareness prokram ban pynshai sha ki paidbah halor ki jingsniew kiba mih na u drok kiba ktah ym tang ïa ki longiïng longsem hynrei ka jingdih drok ka ktah ruh ïa ka shnong ka thaw bad ïa ka imlang ka sahlang, kumta donkam ban pynkhlaiñ bha ïa kum kine ki prokram ai jingpynshai sha ki paidbah, ka kyntu khamtam eh ïa ki kmie ki kpa bad sha baroh ki bynta kiba don ha ka imlang ka sahlang ba kin sngewbha ban ai ka jingiatreilang bad ki tnat sorkar, kumjuh ruh bad ki NGOs khnang ban dup lah ban rat diengkhong ïa ka jingwan ki drok bad kumjuh ruh ban rat diengkhong ïa ki jingsniew kiba mih na kaba kyrni ka jingdih drok.
Ka Programme Manager, MCSWA, ka kong R.Patlong ka la ai jingkren halor ki jait drok bapher bapher kiba ki nongdih drok ki ju pyndonkam, ka jingktah kaba mih na kaba dih drok kaba naduh ba dang sdang haduh ban da kyrni bha ka jingpyndonkam drok, ka la kren ruh halor ka jingshah ktah ka ïoh ka kot ha ki longiïng longsnem kiba don ki dkhot ka longiing kiba dih drok bad ka jingshah peit ibeiñ kito ki longiïng bad kito kiba dih drok.
U Sub-Inspector, na ka ophis jong u Superintendent of Police, East Jaiñtia Hills District, u bah W.Lato, u la kren halor ki kyndon aiñ NDPS Act 1985 kiba dei ki kyndon aiñ jong ki jait jingdih pynbuaid, la pynsngew ïa ki jait jingpynshitom kiba katkum ka aiñ ïa kino kino kiba ngat hapoh ki aiñ NDPS Act.
Kiba la ai jingkren ki kynthup ruh ka Adolescent Health Counselor, Khliehriat Civil Hospital, ka kong Daphihi Pasah, u Supervisor, Office of the District Social Welfare Officer, East Jaiñtia Hills District, u bah P.S.Dkhar.
Ha kane ka prokram la sam ruh ïa ki prize sha kito ki khynnah kiba jop ha ka jingiakop dro dur, kaba long shibynta kum ka jingrakhe ïa ka sngi pyrshah drok bad pyrshah ïa ka jingkhaiï drok, ka la don ruh ka jingiaid rally da ki motor bike kaba ka ophis jong ka DSWO East Jaiñtia Hills District ka la iatreilang bad ka Tuber Biker’s and Tour Association ha kaba ki nongñiah motor bike ki la sdang ïa ka rally na Tuber Kmaishnong sha Deiñchynrum da kaba sam ruh ïa ki kot lyngkdop ban pynbna ïa ka jingsniew kaba mih na u drok.
