Khliehriat kyllalyngkot 16: Ka District Legal Services Authority (DLSA), East Jaiñtia Hills District mynta ka sngi ka la pynlong ïa ka prokram ai jingpynshai paidbah ha kaba la pynshai ïa ki kyndon aiñ ha kaba ïadei bad ka jingshah thombor ki kynthei, ki khynnah bad ka jingïada ïa ki khynnah ban lait na ka shongkha khynnah ne ka Child Marriage, ïa kane ka prokram la pynlong ha Khaidong East Jaiñtia Hills District.
Ha kane ka prokram la pynshai ruh ïa ki hok long trai ba ki kynthei ki khynnah ki dei ban ioh kum ka hok halor ka koit ka khiah, ha pule puthi bad kiwei kiwei.
Haba kren ha ka jingialang, u Legal Aid Counsel, u bah P.N. Swer u la kren halor ki aiñ ki ban ïada ïa ki kynthei, ki khynnah bad kren ruh shibun kiei kiei ha kaba ïadei bad ki jingïada ïa ki kynthei kiba katkum ka aiñ Domestic Violence Act, 2005, la ong ba kano kano ka jingjia kaba thom bor kaba ktah ïa ka met ka phad, ïa ka jingmut jingpyrkhat, ka ioh ka kot ïa ki kynthei kane kan hap hapoh ki kynodn aiñ bad ruh lada u tnga um pynbiang ïa ki jingdonkam ba kongsan ïa ka lok bad ki khun dei ban pyntip sha ka aiñ ne sha ïingbishar.
U bah Swer, u la kren ruh ïa ki kyndon aiñ kiba ïadei bad kano kano ka kam kum ka jingshah jrongkti bad jingthum bat bor ïa ki kynthei ha ki jaka trei bad ong ruh ba ki kynthei kim dei ban pdiang ïa ka jingshah ban bor kum ka nusip namar ka aiñ ka don ban ieng ban kyrshan ïa ki.
Haba kren pat halor ka jingshongkha dang khynnah ne ka Child Marriage, u Legal Aid Counsel u la maham lypa ba dei ban kiar na ka shongkha khynnah kaba mut ka jingshongkha kaba hapoh 18 snme kyrta bad lada lap yn pynshitom katkum ki kyndon aiñ, u pynshlur ïa ka paidbah nongshongshnong ba ki dei ban kyntiew ïa ka pule puthi, kyntiew ïa ki sap ki phong ban shim ïa ki lad ki kabu bad ki jingshah hikai ban kyntiew ïa ka ioh ka kot, la ong ruh ba lada lap ba don kano kano ka jingkynnoh bym dei ruh yn pynshitom da ka aiñ.
Kiba ïa don lang ha kane ka prokram ki kynthup ruh u Waheh Shong Khaidong u bah D.Sutnga lem bad ki nongshong shnong.
