Jowai, Nohprah 04 : Ka Mission Director jong ka DREAM (Drugs Reduction, Elimination & Action Mission) Meghalaya Shillong, ha kane ka 2 tarik u Nohprah kala pynlong ïa ka prokram ai jinghikai shaphang u drok ha District Library Auditorium, Mynthong, Jowai.
Ka DREAM ka dei ka mission kaba hap hapoh ka tnad Social Welfare kaba don ka jingthmu ban ïakhun pyrshah ïa u drug hapoh ka jylla hi baroh kawei‘Free Drug Meghalaya’.
Ha kane ka sngi la wan ban donlang naduh u Director ka DREAM bad Rtd IPS bah F. G Kharshïing, ki dkhot ba kynthup ïaka kong D.V. Lyngdoh, Additional Deputy Commissioner, Jowai, ka District Social Welfare Officer, Jowai, kong Y. Najiar, Secretary ka District Legal Service Authority WJHD kong D.G Kharshïing, ka Dr. J.N Shullai, Director ka Mihmyntdu Community Social Welfare Organisations (MCSWA), ki seng treimon sngewbha, ki nongïalam Elaka, ki nongïalam shnong, ki pulit bad ki briew na ka tnad pule puthi.
U bah F.G Kharshïing ula batai shapang ka jingthmu jong kane ka mission kata ban ïaleh katba lah ban kiar na ka jingdih ïa u drug uba long u nongpynsniew ba khraw ïaka imlang ka sahlang, shuh shuh ula pynsngew shaphang ki lad jingïada lyngba ki prokram ai jinghikai bapher bapher sha ki paidbah nongshong shnong.
Hadien jong kane ka prokram kala don ka jingïaphylliew jingmut lang ban ïasam lem ïa ki jingtip kiba donkam na ka bynta ki lad jingïada pyrshah ïa u drug.
