Pynlong noh da ka jingkhynra, dawa ka COMSO Jaintia Region ïa u DC

Khliehriat naitung 31: Ka Confederation of Meghalaya Social Organisation Jaiñtia Region mynta ka sngi ka ka 31 tarik naitung, hapoh ka jingïalam u Samla Sambormi Lyngdoh uba dei ruh u vice chairman jong ka COMSO Jaiñtia Region, ka la leit ban ïakynduh ïa u Deputy Commissioner ka East Jaiñtia Hills District U Sivansh Avasthi IAS bad ki la dawa na ka ophis u DC ban khynra ïa ki briew kiba nabar kiba wan buhai shnong hapoh ka thain East Jaiñtia Hills da kaba ïa trei lang bad ka COMSO Jaiñtia region.
Kane ka jingleit dawa ka COMSO na u Deputy Commissioner ka East Jaiñtia Hills District ka long halor ka jingthmu ban khanglad bad tehlakam noh ïa ki briew kiba na bar ki ba wan buhai shnong beaiñ shapoh ka thaiñ khamtam ki nong Bangladesh, na ka liang ka COMSO ka la buh ruh da ka doskhas hakhmat u Deputy Commissioner ba la soi da u Vice Chairman COMSO Jaiñtia Region, u bah Sambormi Lyngdoh bad u Secretary COMSO Jaiñtia Region, u bah Roiter.
“Ka jingthmu jong ka COMSO ka long khamtam namar ba dang myn ha kine ki sngi ka sorkar jong ka jylla Assam ka dang pynlong ïa ka jingkhynra mynder ne ka Eviction Drive bad beh noh ïa kito ki bym dei ki nong India ba kin leit phai noh sha ki jaka ba ki wan bad ka jylla Assam kam shah shuh ïa ki bym dei ki nong India ban shong ban sah hapoh ka jylla Assam, kumta lehse kito ki briew kiba ka jylla Assam ka la beh ki lah ban pynlong jaka rieh tngen pynban hapoh pud u sam ka East Jaiñtia Hills bad ban wad jaka ban shong ban sah shapoh ka thaiñ jong ngi”ong u kyrwoh na ka seng.
“Kum ban shu pynkynmaw ba dang ha kine ki sngi ba la dep ka Union Ministry of Home Affairs ka la dep bthah ïa ki baroh ki jylla ban thaw da ka Special Task Forces (STFs) na ka bynta ban peitngor ïa ki briew kiba nabar ka ri India ki ba thmu ban rung beaiñ shapoh India, hynrei ha ba ïakren bad u DC ka East Jaiñtia Hills u la iathuh ba na ka liang jong ka jylla kam pat phah ban thaw ïa kata ka STFs hapoh ka District kat kum ba long mynta.
Hynrei na ka liang jong u DC ka EJHD u la ong ba u long la kloi ban iatrei lang na ka bynta ka jingbha jong ka District khamtam ban khanglad ïa ki bar ri ban rung beaiñ shapoh ka District, u la ong shuh shuh ba un sa khot ka jingïalang bad ki Waheh Shnong kiba don hapoh ka thain East Jaiñtia Hills District bad ruh ïa ki heh sorkar ban wad lad kumno ban khanglad ïa ki briew kiba nabar ban rung beaiñ shapoh ka district bad ban wad lad ruh ban pynlong ka jingkhynra ha ki katto katne ki shnong ba ki bar ri ki lah ban rieh tngen da kaba ïa trei lang bad ki Waheh Shnong jong ka thaiñ ”Pynkur u kyrwoh.