Mawkyrwat, Jylliew 27: Ka National Commission for Protection of Child’s Rights (NCPCR) ha ryngkat ka jingïatreilang jong ka State Commission for Protection of Child Rights (SCPCR) bad ki bor pynïaid jong ka distrik ha ka 26 tarik u Jylliew, 2024 ka la pynlong ïa ka jingïalang ïa mir jingmut ban ïada bad pynduh jait ïa ka jingkhaïi khynnah ha South West Khasi Hills District, Mawkyrwat.
Ïa ka jingïalang la pynïaid da u bah P.M. Wahlang, District Child Protection Officer (DCPO), South West Khasi Hills District, Mawkyrwat ha kaba u bah L.T. Tariang, Assistant District Commissioner, South West Khasi Hills District, Mawkyrwat u la long u kongsan bad ka kong I. Warjri, Assistant Director (Good Governance Cell), MATI, ka la long ka nongai jingkren ha kane ka sngi kum ka Resource Person.
U bah L.T. Tariang, Assistant District Commissioner, South West Khasi Hills District, Mawkyrwat ha ka jingkren jong u, u la ban khia ïa ki jingbun ki jingjia jong ka jingshah-die shah-thied beaiñ ki khynnah hapoh ka Ri India, bad u ong ba kum ka South West Khasi Hills District ki dei ban long kiba la khreh ban tehlakam ïa kum ki kine ki jingeh lada ïakynduh nangne shakhmat, khamtam namar ka South West Khasi Hills District ka dei ka distrik kaba don ha khappud bad ka Ri Bangladesh, namar lada ym husiar, kane ka jingsniew kan sa saphriang kum u drok uba la pynkyrni ïa bun paid ki khynnah samla.
Ka kong I. Warjri, Assistant Director (Good Governance Cell), MATI, ha ka jingkren jong ka ka la ong ba ïa ka Human Trafficking lah ban khot ruh kum ka “Jingshah tehmraw ba thymmai” bad ka wan ha ka kyrdan kaba lai na ki lad kamai pisa da ka lynti kaba sniew.
Namarkata, bun na ki lanot ki dei beit ki khynthei bad khynnah kiba ngat ha ka jingkhaïi met, jingphah trei jubor bad kiwei de. Ka la ong ruh ba ka jingpynlong ïa ki briew ba kin ngat ha kine ki jingsniew ka dei borabor ba ban ka jingduk, ka jingduna ka pyrkhat ka pyrdaiñ and ka jingshimsting ki bor jong ka aiñ.
Kumta, ha ka jingkren jong ka, ka ai jingtip ruh shaphang ki lad jingïada ba la buh da ka sorkar India na ka bynta ki khynnah kum ka Commissions for Protection of Child Rights Act, 2005 bad ka Immoral Traffic (Prevention) Act,1956. “Nalor ki bor jong ka aiñ, ka jingkloi ban ïada ka dei ban long ruh naduh ïing na sem bad ki shnong ki thaw”, ong ka kong I. Warjri.
Shuh shuh ka la ai jingmut ruh ban shna ka WhatsApp Group ban thaw ïa kata ka ‘Anti-Trafficking Cell’ kynthup naduh ki rangbah shnong, ban dup kham-stet ka rukom trei kam ban ïada ïa ki khynnah bad kiwei de ki briew kiba lah ban ngat ha ka jingsniew jong ka jingshah khaii beaiñ bad donkam ruh ban pynïadei bad ki jingkylla jong kane ka pyrthei namar ki briew kiba leh ïa kine ki kam sniew kin don shibun ki lad ki lynti ban pynroi ïa kane ka kam sniew khamtam ha kane ka juk ‘Artificial Intelligence’ lane kata ka jingstad bym dei jong u briew hynrei jong ki bor mashin.
