Pynlong ‘Mock Exercise’ halor u jumai ha ki skul ka jylla

Shillong, Jymmang :Shi bynta jong ka jingrakhe ïa ka jingdap 50 snem ka jylla Meghalaya mynta baroh shi snem, bad shi bynta ban ïalap paidbah halor ka jinglong ba la pynkhreh lada jia kano kano ka jingkhynñiuh jumai na ka bynta baroh ki skul ki ba don ha ka jylla, na ka liang ki ophis jong ka tnat Civil Defence and Home Guards Department ki la pynlong ïa ka ‘mock exercise’ ne ka jingai jinghikai ha ka ba ïadei bad ki lad jingïada ha ki district bapher bapher ka jylla naduh kane ka taïew ba la lah.
Hynne ka sngi katei ka tnat sorkar ka la pynlong ïa kane ka prokram aijinghikai halor ki lad jingïada na ki jingkhynñiuh jumai hapoh Chengkom Me’dik Secondary School, Ampati, South West Garo Hills, Duramong Secondary School, Siju, South Garo Hills, Simsa ngre School Williamnagar, East Garo Hills District, Resubelpara Government School, North Garo Hills bad ha Bolchugre Secondary School, Tura , West Garo Hills.
Kumjuh ha ka 20 tarik mynta u bnai ïa kane ka jingai jinghikai halor u jumai la pynlong hapoh Sati Raja School, Umsning, Ri Bhoi District, Lumjingshai Upper Primary School, Domjyrti-Rangmaw, South West Khasi Hills bad ha Sibsing Memorial Government Higher Secondary School,Nongstoiñ, West Khasi Hills District.
Ha kine ki prokram ki nonghikai, ki staff bad ki khynnah skul ki la ïoh pdiang ïa ki jinghikai ba kongsan ha ka ba ïadei bad kumno bad wad bad ban aijingiaïrap, ki jingai jingsumar ba kyrkieh bad kumno ban pynkynriah na ki jaka ki ba shah ktah ha u jumai lane na kiwei kiwei pat ki jingjia shah pynjulor ha ki bor ka mariang.Kane ka long katkum u kyrwoh lyngba u Public Relations Officer, Directorate of Civil Defence & Home Guards,
Meghalaya, Shillong.