Nongstoiñ, Nailur, 28: Kum ka jingkynmaw burom ïa ka lyngkhuh snem kaba hynñiew ong ka jingkhlad noh jong u (L) u Maieit Hopingstone Lyngdoh, ki nongïalam jong ka Hynñiewtrep Youth Council Mawthadraishan circle ha ka lah sngi u Blei, ka la pynlong ïa ka prokram ïamareh marathon kaba shiphew kilomitar kaba la sdang na Parïong haduh Nongshilong.
Ha katei ka sngi ki la don haduh laiphew hynriew ngut ki samla kiba la wan ban ïashim bynta. Ha katei ka jingïamareh, u samla Shainingstar Marweiñ na ka shnong Lawrynjam u la rah ïa ka nam lah duh, u ba wan ba ar u dei u samla Jopkordor Lyngdoh na ka shnong Mawkyllei bad u ba la wan ba lai u dei u samla Banshanlang Kurbah na ka shnong Markasa.
Ha katei ka sngi la pynlong ruh ïa ka jingïalang ba lyngkot ha madan shnong Nongshilong, ha kaba u bah Korbarlang Syiemlieh sordar jong ka shnong Kynshi Mawteijrong u la long u kongsan bad u bah H.S.Thabah sordar jong ka shnong Nongshilong u la long u symbud kongsan. Nalor kata ha katei ka jingïalang la ïadon ryngkat ruh da ka kong S.Lawriniang vice president ka HYC Women wing North Khasi Hills District.
U bah Korbarlang Syiemlieh haba ai jingkren kum u kongsan ha katei ka sngi, u la ong ba ka HYC ka la leh ïa ka bynta ka donkam haduh katta katta, ban kynmaw burom ïa u bah Hopingstone Lyngdoh, u ba long tang ma u, u nongïalam u ba skhem ka jingmut jingpyrkhat bad uba len lade na ka bynta ka ri bad ka jaitbynriew.
U la ong ruh ba ha kine ki sngi yn ym ïoh shuh ki nongïalam kiba long kum u (L) bah Hoping bad dei tang ma u marwei, u ba dei hok ban ïoh ïa ka nam kum u dieng Bilat ka ri Khasi. Namar naduh ba sdang haduh ba un da khlad noh um shym la shet kylla ïa ka jaitbynriew. Hynrei u ïeng skhem hi triang wat hapdeng ki jingtynjuh kiba shyrkhei bad ka umsaw kaba khih phaloh khamtam eh ha ka saiñ pyrthei.
U bah H.S.Thabah symbud kongsan haba ai jingkren ha katei ka sngi, u la pynkynmaw ha ki nongshong shnong ïa ki jingdawa jong u (L) bah Hoping na ka sorkar ba ka dei ban pynbeit noh ïa u pud u sam, ka Khasi Jaiñtia state, ban weng noh ïa ka Para 12 A na ka Schedule, ban weng noh ïa ka Joint Cadre hapdeng ka Meghalaya bad Assam kaba dei ha ka kam pulit.
U la pynkynmaw ruh ïa ki lai tylli ki kyntien shong sbai kiba u (L) bah Hoping u bat skhem triang haduh ka sngi ba un da khlad noh na kane ka pyrthei bad kita ki long, “Leh hok, Ïeng skhem halor ka nongrim khlem kylla bad ban ïakhun khlem pyndem.”
U la ong ruh ba u briew kum u Bah Hopingstone u dei shisha u rangbah Khasi uba shisur shidur bad uba ieid ïa la ka jong ka jaidbynriew bad uba len lada ne ka bynta kiwei pat.
