Pynlong mamla ka NGT ïa ka JHADC, MoRTH bad Water Resources ïa ka jingujor ka KYM

Jowai, Nailur, 09: Ka “Khooid Ya ka Wah Myntdu”hadien ka jingwan ïakhun ïa ka hok jong ka Wah Myntdu shaduh ka National Green Tribunal Principal Bench, New Delhi kaba la shong bishar haka 22 tarik u Nailar, 2025 la pyntip ba ki lai tylli ki tnad treikam kin hap ban ai jubab lang halor kane ka jingujor na ka bynta ka jingshah ktah ka Wah Myntdu.
U Bah Khroo L Pariat ula ong ha ka jingïadei bad ka jingshong bishar ïa kane ka mukotduma, ka NGT ka la pynmih ïa ka hukum bad pdiang ïa ka jingujor ba ka Jaiñtia Hills Autonomous District Council (JHADC), ka Ministry of Road Transport and Highways bad ka Department of Water Resources kin shah pynlong mamla ha kane ka mukotduma ba la ujor.
Ha kaba ïadei bad kane u Bah Pariat ula ong ka Council ka dei ka nongpeit ïa ka khyndew ka shyiap kumba la pynkup bor ha ka, da kaba buh jingkylli kumno kane ka Council ka dang ïaidlaid ïa kane ka kam bad dei halor kane ka nongrim la pynhap lang ïa ka JHADC halor kane ka case. Ha kaba ïadei bad ka ka Ministry of Road Transport and Highways jong ka sorkar India kane ka dei ka tnad treikam kaba don bynta halor ka jingshan ïa ki surok By-Pass kiba don hajan ka Wah myntdu bad kaba long ruh ka nongbei pisa.
Katba ha kaba ïadei bad ka Department of Water Resources ula ong ka dei ka nongpeit ïa ka um ka wah bad na ka liang ka sorkar India ruh ka la aiti ha kane ka tnad ban pynbha ïa ka Wah Myntdu, kumta baroh kine ki lai tylli ki tnad ophis kin hap don bynta lang ban jubab ïa kane ka jingujor.
Halor ka jinglong jingman jong ka Wah Myntdu ula pyntip na ka liang ka NGT ka la ïoh jingujor kiba bun ki bynta ka Wah ki la dap kyndew lut namar ka jingtheh pathar ïa ka kyndew bad ka jingbrew ñiut, kumta la hukum ïa ka tnad PWD ban kan wad ïa ki lad ki lynti ban pynkhuid ïa katei ka kyndew ha ki bynta ka Wah bad kumjuh ïa ki pynthor kba.
Ïa kane ka mukotduna jong ka NGT u Bah Khroo L Pariat ula ong ba yn shong bishar biang ïa ka haka 17.10.2025.
Namar ka jingbret pathar ïa ki ñiut sha ki bynta ka Wah Myntu, ka “Khooid Ya ka Wah Myntdu” ka kwah na ka tnad Municipal ban pynïoh noh ïa ka jaka theh ñiut kaba pura, khnang ban lait na kino kino ki jingbret pathar ïa ki jaboh. Ka seng ka kloi ban ïatreilang halor kane da kaba kyntu lang ïa baroh ki nongshong shnong kiba don talawiar ka Wah Myntdu.