Nongpoh, Jymmang, 25: Ka University of Science and Technology Meghalaya ha ka sngi Saitjaiñ ka la pynlong ïa kawei ka prokram kyrpang ba la tip kum ka ‘Parents-Management Meet’ kaba long ruh shi bynta ba kane ka skulabah mynta u snem ha ka 10 tarik u Jymmang 2025 ka la leh burom ïa ka jingdap 25 snem ha ki jingshakri ban kyntiew ïa ka pule ka puthi.
Ka jingthmu kane ka ‘Parents Management Meet’ lane ha ka ktien Khasi kaba dei ka jingïakynduh lang ki kmie ki kpa, ka dei shi bynta ka thong jong ka skulbah ban ïa don bynta lang naduh ki kmie ki kpa, ki nonghikai bad bor pynïaid skul ha kaba saiñdur ban pynlong ïa ka USTM kum kawei na ka skulbah kaba biang tam ki ban ïa ryngkat dor bad kiwei kiwei ki skulbah hapoh ka ri ka pyrthei.
Ha kane ka sngi la sakhi ruh ba hapoh ka Auditorium Hall la pyndap smam da ki kmie ki kpa na kylleng ki jylla ba la ïa don lang ki samla pule bad ki bor pynïaid katei ka skulbah, kaba la pdiang burom da ka Anju Hazarika, kaba dei ka Registrar ka skulbah USTM.
Haba kren ha kane ka sngi, u Chancellor ka USTM u Mahbubul, u la ong ban kyntiew ïa ka jingnang jingstad ne ka pule ka puthi, ka dei ka jingïaid lynti kaba donkam ban ïa kyrshan na baroh ki liang ba kynthup naduh ki kmie ki kpa, ki samla pule, ki nonghikai bad ki bor pynïaid skul bad kane ka ka jingïakynduh lang ïa ki kmie ki kpa, ka dei ka thong jong ka skulbah USTM ban dang saiñdur shuh shuh ïa ka jingnang jingstad kaba donkam lyngba ka jingïatrei lang na baroh ki liang.
U la ong ruh ba ka skulbah USTM ka ban khia kumno ban dang saiñdur ïa ki samla pule, ha kaba ka thong ka long ban pynlong ïa ki samla pule kiba tynshaiñ ha ka jingim bad u la kren ruh halor shibun ki bynta kiba khraw bha jong ki kmie ki kpa ha kaba kyntiew ïa ki khun sha ki kyrdan ba shaneng bad ruh kiba long kita ki nongsaiñdur ban kyntiew ïa ka pule ka puthi bad ka jingnang jingstad ha kane kajuk stad ba mynta.
Kane ka jingïalum lang ki kmie ki kpa, ka dei ruh shi bynta kum ka nuksa ka jingtreikam noh ka PA Sangma International Medical College and Hospital Parents’ Health Card. Kane ka Health Card ka long ruh ka thong ban ai jingsumar bap aka ïa ki kmie ki kpa bad haba ki wan shah sumar kin ioh shibun ki jingmyntoi.
La ai jingkren ruh da u Vice Chancellor ka USTM u G.D Sharma, u ba la kren shai ba ki kmie ki kpa ruh ki don shisha ka bynta kaba khraw ha kaba saiñdur ïa ka jingnang jingstad bad ban kyntiew ïa ka pule ka puthi. Ha kane ka sngi, kiba bun ki kmie ki kpa jong ki samla kiba pule ha katei ka skulbah ruh ki la ai ka jingïaroh ïa ki bor pynïaid ka skulbah USTM halor shibun ki thong kiba ka buh ban dang pynjanai ïa ka pule ka puthi bad ruh ban don kata ka thong ban saiñdur lang na ka bynta ban kyntiew ïa ka ri bad ka jaid bynriew.
