Nongpoh, Jylliew 26: Ban ai jinghikai bad ban pynsgnewthuh sha ki paidbah nongshong shnong ka Shnong Umsawnongkharai ha Ri Bhoi District ba kin tip ïa ka jingkordor ban ïada ïa ka mei mariang, ka Shnong Umsawnongkharai mynta ka sngi ha ka jingïalam u Rangbah Shnong, u Bah Angelus Sun bad u Secretary, u Bah Tony Shylla ki la pynlong da ka jingthung dieng ha ka khlaw shnong kaba long shi bynta ban ïada ïa ka mei mariang.
Haba pynlong ïa kane ka jingthung dieng ha katei ka khlaw shnong ka shnong Umsawnongkharai la shim bynta lang ruh da ki paidbah nongshong shnong ha kaba ïa ki tynrai dieng la ai sngewbha da ka Central Reserve Police Force na Nongpoh. ha kane ka sngi da ka jingshim bynta lang ki paidbah nonghsong shnong la lah ban thung haduh 2000 tylli ki tynrai dieng ha ka khlaw shnong jong ka shnong Umsawnongkharai.
Kumba la pynpaw da u Bah Angelus Sun, uba dei u Rangbah Shnong, la ong ba ka jingthmu ba la pynlong ïa kane ka jingthung dieng ka dei ka jingangnud ka shnong ba ki paidbah ki dei ban mih shakhmat ban pynlong ïaka mariang ba kan ioh ïaka rong jyrngam lyngba ki dieng ki siej bad ka dei ruh ka jingïakhun ban pynlong ïaka mariang ban dap da ka jingjyrngam lyngba ki jingthung dieng.
