Khliehriat Iaiong 20: Kum shi bynta ban rakhe ïa ka Azadi Amrit Mahotsav, ka ophis jong u District Medical Health Officer East Jaiñtia Hills District mynta ka sngi ka la pynong ïa ka Ayush Bharat Health Mela ha Saipung ha kaba lyngba kane ka mela ki paidbah ki ioh ïa ki lad jingiarap ha kaba iadei bad ka koit ka khiah, kum ki dawai, ki injek bad kumjuh ruh ki ioh ka jingpynshai ha kaba iadei bad ka mat ban kyntiew ïa ka koit ka khiah.
Haba kren ha ka jingialang, u MDC ka thaiñ, u Arbor Hima Darnei, MDC Saipung Consti-tuency, u la ong ba kane ka Ayushman Bharat Health Mela jong ki Block kaba hapoh ka jingpeit jong ka tnat jong ka Health and Family Welfare jong ka sorkat India ka dei kaba don ïa kata ka thong ban pynioh ïa ki lad ai jingsumar sha ki paidbah nong shong shnong jong ka ri bad ka long ka lad ai jingmyntoi ïa ki paidbah.
U District Medical and Health Officer, East Jaiñtia Hills District, u Dr D.Shylla, u la pynshai ba kane ka mela ka dei kaba la pynlong na ka bynta ka jingioh jingmyntoi ki paidbah ha kaba ki lah ban ioh ei ïa ki dawai, kin ioh ïa ki jingiasyllok bad kiwei kiwei ki lad ai jingiarap kiba na ka bynta ka koit ka khiah, kumjuh ruh ha kane ka mela la pynsgew sha ki paidbah ïa ki jait skim bapher bapher bad ki lad ai jingiarap, kumta u la kyntu ïa ki paidbah ba ki dei ban ïa wan ban ïa shim bynta ha kum kine ki mela.
Ha kane ka mela ba la pynlong, ki nongtrei jong ka tnat ka koit ka khiah, ki la ai ka jingshakri sha ki paidbah kum kaba ai ïa ki jingiasyllok ha kaba ïadei bad ka kha ka pun, ki jingai jingsumar ïa ki khynnah bad ki khyllung, ai jingsumar ei ïa ki khmat, ki don ruh ki doctor ENT, ki doctor bniat, ki paidbah ki ioh ei ïa ka dawai, ki Blood Test, Routine immunization, injek Covid , kaba thew jingkhia.
Ki don ruh ki stall kiba ai jingpynshai kum ka MHIS & PM-JAY, PMMVY, IEC stall bad kiwei kiwei ki jingpyni nam kum ki jingbam ba la pynbit pynbiang da ka tnat Food and Safty East Jaiñtia Hills District, la ïa shim byynta ruh da ka Punjab National Bank Saipung Branch ha kaba ki paidbah ki lah ban plie ïa ki bank account jong ki ha kane ka bank.
La ïa wan ban ia shim bynta ha kane ka mela da ki ki paidbah ba kynthup naduh ki tymmen, ki rangbah, ki khynnah bad ki khynnah skul, ki la don haduh 630 ngut kiba la ioh jingmyntoi ha ka medical check up, 203 ngut ki ioh ïa ka Degital/ Unique Health ID , la sam ruh ïa ki Ayushman Card sha ki 15 ngut ki briew bad ki don 10 ngut kiba la ioh ïa ka injek covid-19.
Kiba la ïa don lang ha kane ka prokram ki kynthup ruh u Block Development Officer Saipung C&RD Block, u Dr R.Pyrtuh, ka District Immunization Officer I/c, East Jaintia Hills District, Dr. (Mrs) N.P. Suchiang, Sub-Divi-sional Medical and Health Officer, East Jaintia Hills District, Dr. W. Bamon, Khliehriat, Dr. K. War Laithma, ONG Gynaeco-logist and Dr. N. Dhar, Dental Surgeon, Sutnga CHC.
