Pynlong ka tnad pule puthi Ri Bhoi da ka District Level Janbhagidari Event halor ka thong ka G20, NEP bad FLN

Nongpoh, Jylliew 14: Ban pynurlong ïa ka thong jong ka Janbhagidari Event na ka bynta ban ai jingpynshai bad ai jinghikai sha ki khynnah skul bapher bapher hapoh Ri Bhoi District, ka ophis u District Mission Co-ordinator, SSA-SEMAM bad ka ophis ka District School Education Officer Ri Bhoi District ka la pynlong ïa ka District Level Jahbhagidari Event ba ar sngi da ki prokram bapher bapher ba la wan ban shim bynta da ki khynnah skul ka dong bad ka thaiñ Ri Bhoi.
Kane ka prokram ban ai jinghikai halor ka thong jong ka G20, National Education Policy bad ka Foundation of Literacy and Numeracy ka la sdang ha ka 12 tarik u Jylliew bad la pynkut ha ka 13 tarik u Jylliew ba la pynlong ha ki skul bapher bapher jong ki saw tylli ki Block kiba don ha Ri Bhoi District.
Kum ban pynpaw, kane ka Jan Bhagidarui Event ka dei ka prokram ba la pynlong ha kylleng ki jylla jong ka ri ban ai jinghikai shaphang ka thong jogn ka G20, NEP, FLN kaba la sdang naduh ka 1 tarik u Jylliew 2023 bad kan kut haduh ka 15 tarik u Jylliew 2023.
Ha kine ki prokram ba ar sngi la pynlong ki jingïakop bapher bapher naduh ka jingïakop ban ïathuh khana (Story telling) ka jingïakop dro dur, ban pyni ïa ka sap ha kaba ai jinghikai (Teaching learning Materials) bad kiwei kiwei ki jingïakop kum ka thong jong ki prokram bapher bapher ban hap hapoh kata ka Janbhagidari Event.
Ha ka prokram ba la pynlong hynnin ka sngi ha District Library Auditorium Hall la wan ruh ban shim bynta naduhh ki khynnah skul bad ki nonghikai na ki 12 tylli ki skul ba hap ha ki saw tylli ki C&RD Block ba kynthup ïa ka Umling, Umsning, Jirang bad Bhoirymbong C&RD Block.
Ha kane ka sngi la wan ruh ban shim bynta da u Deputy Commissioner ka Ri Bhoi, u Arpit Upadhayay kum u kongsan bad la sakhi lang ruh da ka jingdon lang u Bah R.Dkhar DSEO, Shri V.Nianglang, DMC District Unit of SSA-SEMAM bad kiwei kiwei ki ophisar na ka tnad pule puthi ka District.
Haba kren kum u kongsan ha kane ka sngi, u Deputy Commissioner ka Ri Bhoi, u Arpit Upadhyay u la pynpaw ka jingsngewkmen bad ai mynsiem ruh halor kane ka jingpynlong ïa kane ka prokram ba kyrpang da ka tnad pule puthi kaba lah ban ai jingmyntoi shibun eh ïa ki khynnah skul ka District.
U la ong ruh ba ka dor jong ka pule puthi kan urlong ruh tang lada ngi ban khia halor ki tynrai ne ki rukom kiba ngi hap ban ïa khun pyrshah na ka bynta ban poi sha ka thong jong ka jingim. Kumta, u la kyntu ruh ïa ki khynnah skul ba kim dei ban duh mynsiem bad kum ki samla ki hap ban trei shitom ym tang ban wan rah kata ka jingkylla ha ka jylla bad ka ri, hynrei ka jingkylla kan wan ruh na ka bynta ka jingim jongki ba kin long kita ki khynnah kiba ka lawei ka long kaba phyrnai, u la bynrap.
La pynkut ruh ïa kane ka prokram da ka jingsam ïa ki khusnam sha ki nongjop ha ki jingïakop bapher bapher bad la shim ruh ïa ka jingsmai jong ka thong ka NIPUN.