Mawkyrwat, Ïaïong 07 : Ka South West Khasi Hills District Kayaking & Canoeing Association ha ryngkat ka jingïatreilang bad ka Meghalaya Canoe Association ka la pynlong ïa ka jingkieng lieng kaba ki khot da ka Kayaking & Canoeing Camp Awareness ha Phot Mawpon, South West Khasi Hills District, Mawkyrwat ha kaba haduh 50 ngut tam ki samla shynrang bad kynthei ki la ïoh jingmyntoi na ka jingai jinghikai.
Ka jingthmu jong kaba ka lympung ka long ban ïoh ban jied ïa ki ‘rang bad ki ‘thei ïalehkai na ka bynta ka trial ha kane ka jingiakop kieng lieng ne ka Kayaking ba kin ïoh ban leit ïashimbynta ha ki jingiakop bapher bapher la ka long hapoh ka District, ka Jylla Meghalaya ne ha kiwei de ki jylla jong ka Ri India bad wat shabar jong la Ri ruh.
Lah ban kdew ruh ba kane ka South West Khasi Hills District Kayaking bad Canoeing Association ka dei ruh kaba nyngkong tam eh na baroh ki District hapoh jylla Meghalaya kiba ïoh ban seng hi da lade hapoh ka distrik ha ka jingïatreilang bad ka Meghalaya Canoe Association, Umtham.
U bah Renikton Lyngdoh Tongkhar uba dei u MLA ka Mawkyrwat Constituency kum u kongsan ha ka jingkren jong u, u ai ka jingïaroh ïa ka South West Khasi Hills District Kayaking and Canoeing Association bad ïa ka Meghalaya Caneo Association kiba la pynlong ïa kane Kayaking Awareness Cam ba nyngkong eh hapoh ka distrik. U la ong ruh ba da ka jingstad ki nongïalam jong ka SWKHDK&CA ban wanrah thymmai kum ïa kane ka jinghikai ïa ki samla kumno ban tip ban ïalehkai kieng lieng bad lyngba ka jingtrei shitom ryngkat ka jingdon ïa ka jingkitkhlieh kum ki samla kane ka camp kan sa long ka jingmyntoi ym tang ïa ki shimet hynrei kan sa rah ruh ïa ka nam ka burom ïa ka dong ka thaiñ hi baroh kawei.
Ha kane ka sngi, la ïa donlang naduh u Dr. W. Maner uba dei u President jong ka Meghalaya Canoe Association, u bah Khaiñ Nongsiej, President ka South West Khasi Hills District Kayaking & Canoeing Association, ka kong Shela Vincent, Secretary jong ka Meghalaya Canoe Association, u bah H.S Diengdoh ha ryngkat ki 50 ngut tam ki khynnah samla kiba la wan shim bynta ha ha kane ka sngi bad ki wei de ki riew rangbah kiba shah khot sngewbha.
