Pynlong ka SSSM ïa ka jingïakop dro, ka jingïalehkai badminton bad ka jingïamareh marathon

Mawkyrwat, Jymmang 30: Ka Seng Samla Shnong Mawlangwir (SSSM), ha ryngkat ka jingïatreilang lang bad ka ophis u Divisional Officer ka Soil & Water Conservation Division, South West Khasi Hills District, ha ka 27 bad 28 tarik u Jymmang, 2022, ka la ïoh ban pynlong ïa ka jingïakop dro, ka jingïalehkai badminton bad ka jingïamareh marathon kum shi bynta ban rakhe ïa ka lyngkhuh snem ba 50 jong ka jylla Meghalaya bad kumjuh ruh ïa ka jingdap 75 snem jong ka jinglaitluid jong ka ri India.
Ha ka 27 tarik, ka SSSM ka la ïoh ban pynlong ïa ka jingïakop dro ha kaba la ïa shim bynta da ki khynnah skul jong ki skul bapher bapher. Ïa kane ka jingïakop la rah ïa ka nam nongjop da u Balapynskhem Shangpliang na ka JKMP Higher Secondary School, Mawkyrwat. I ba wan ba ar i dei i Mereyline Syiemlieh na ka JKMP Higher Secondary School, Mawkyrwat, bad u ba wan ba lai pat u dei u Alfordjune Marweiñ na ka Saiñ Jingtip Multi-purpose Secondary School, Mawlangwir.
Ha kane ka sngi la ïoh ruh ban sdang ïa ka jingïalehkai badminton kaba para marwei hapoh Mawlangwir Mini Indoor Stadium ha kaba la ïa shim bynta shitrhem da ki samla jong ka dong ka thaiñ baroh kawei, shynrang bad kynthei.
Ha ka 28 tarik pat, ha ka por 7 baje mynstep, ka SSSM ka la pynlong ïa ka jingïamareh marathon kaba 10 km na ka bynta ki shynrang bad kaba 5 km na ka bynta ki kynthei. La plie ïa kane ka jingïamareh thong da u Dr. K.K. Nongsiej, Principal ka Sngap Syiem College, Mawkyrwat, uba la long u kongsan. Ha shwa ban plie ïa ka jingïamareh, na ka liang u kongsan u la ai jingkren da kaba buh ka jingkyntu bad jingai mynsiem ruh ïa ki samla ba kin ïai trei shitom. “Namar ban ïoh ïa ka nongjop, kam dei ka kam kaba suk hynrei ngi hap ban ïai trei shitom”, u la ong. U la pynpaw ruh ba katei ka jingïamareh thong kan plie ka lad ïa ki khun samla ba kin nang lah ban pyni ïa ki sap ki phong bad ka jinglah ka jong ki ym tang hapoh ki kyrdan distrik hynrei ha kiwei ki kyrdan ba kham sha jrong ruh de.
Ïa kane ka jingïamareh thong, ha ka liang jong ki shynrang, la rah ïa ka nam nongjop da u samla Wolbetstar Ramsiej (31.52 min) na Sakwang. U samla Iwelljohn Ramsiej (32.53 min) na Sakwang u la bat ïa ka kyrdan ba ar bad u samla Neverson Jyrwa (34.21 min) na Jakrem u la bat ïa ka kyrdan ba lai. La ïoh ruh ban ai ïa ka khusnam ba kyrpang sha u heprit Jimpeter Wanniang na Jakrem, u khynnah uba dang 9 snem ka rta, uba la mareh pyndep ïa ka thong hapoh 62 minit.
Ha ka liang ki kynthei pat, ka samla Marqueenless Ramsiej (21.00 min) na Sakwang ka la wan ba nyngkong, ka samla Lyntijingkyrmen Kharjahrin (21.10 min) na Sakwang ka la wan ba ar bad ka Kyntimon Marweiñ (21.27 min) na Mawlangwir ka la wan ba lai.
Ha kane ka sngi la ïoh ruh ban pynkut ïa ka phainal jong ka badminton. Ha ka jingïalehkai ba para marwei jong ki kynthei, ka samla Baladamonshisha Wanniang na Mawlangwir ka la rah ïa ka nam nongjop bad ka samla Daïaiphirabanker Wanniang na Mawlangwir ka la wan ba ar. Ha ka jingïalehkai ki shynrang pat, u samla Given Warder Lyngdoh na Mawlangwir u la khur ïa ka nam nongjop bad u Kapani Mao u la wan ba ar.
Haba pynkut ïa kitei ki prokram bapher bapher, la ïoh ban pynlong ïa ka jingïalang ba lyngkot ha kaba u bah Kynsaibor Marweiñ, Principal ka Balang Mawlangwir Higher Secondary School, Mawlangwir, u la long u kongsan.
Ha katei ka sngi la ïa don ryngkat ruh u bah N.S. Wanniang, u Range Officer ka Soil & Water Conservation, Mawkyrwat Range, uba long ruh ha ka juh ka por u Myntri Shnong ka shnong Mawlangwir, u bah Koland Lyngdoh, Secretary Shnong Mawlangwir, u bah P.L. Marshilong kiwei ki rangbah bad ki khun samla jong ka shnong Mawlangwir.