Pynlong ka SSSM ïa ka jinghikai kumno ban tehlakam na ka bynta ka kyiad bad u drok

Mawkyrwat, Jymmang 06: Ka Seng Samla Shnong Mawkyrwat (SSSM) da ka jingthmu ban pynsngewthuh ha ki paidbah bad kumjuh ruh ha ki khynnah skul halor ka jingma kaba ap lada kin pyndonkam ïa ka kyiad bad u drok ka la pynlong ïa ka jingai jinghikai ba shi sngi ne ka ‘Seminar on Drug Abuse & Alcoholism’ halor ka phang “Rat Diengkhong ïa ki jingdih pynbuaid, sdang na la rympei” hapoh ka Dorbar Hall Mawkyrwat, South West Khasi Hills District.
Ka jingthmu jong kane ka program ka long ban pynsngewthuh ha ki paidbah nongshong shnong ba ki dei ban long kiba ïatreilang bad ki nongïalam jong ki Seng Samla Shnong khnang ba yn lah ban tehlakam ïa ki jingsniew kiba la sdang ban jyllei ha kine ki sngi kiba mynta bad lyngba kane ka prokram kan long ruh ka jingai mynsiem ïa ki paidbah ba kin sa lah ban ai ki jinghikai ha ki longïing longsem jong ki na la ki jong ki khun ba kim dei da lei lei ban ngop ha kum kine ki jait jingsniew namar ki pyntroiñ ïa ka jingim ha ka shi khyllip mat.
Namarkata, kum ka Seng Samla Shnong Mawkyrwat kaba ju peit ju khmih ïa ka imlang sahlang na ka bynta ka bha ka miat hapoh shnong ‘poh thaw bunsien ki la ju lap ïa shibun ki jingsniew kiba la sdang ban suh thied hapoh shnong poh thaw. Kumta shwa ban dier ka por, na ka liang ki samla kiba don ka jingkitkhlieh ïa ka lawei ki khun samla bad na ka bynta ki ban dang khie dang san ki la ïoh ban pynlong ïa ka prokram ai ki jinghikai namar kiba bun ki samla ki la shah ïalam bakla ha kine ki sngi ba mynta da kaba ki la sdang pynngop noh ha kine ki jingdih kiba sniew, kiba pynjot ym tang ïa ki shimet hynrei kaba wanrah ruh ka jingeh, ka jingshong syier hapoh shnong ‘poh thaw bad wat ha ka imlang sahlang tang namar ka jingkharoi jong kine ki kam sniew.
Ha kane ka program ai jinghikai halor ka phang, “Rat Diengkhong ïa ki jingdih pynbuaid, sdang na la rympei”, la ïoh ban ïa shimbynta naduh ki longkmie, ki longkpa, ki samla ha ryngkat ki khynnah skul jong ka shnong Mawkyrwat ha kaba ki la ïoh shibun ki jingmymtoi lyngba jinghikai ba ki la ïoh lyngba ka jingpynshai napoh ka tnad ka koid ka khiah, na ka tnad pulit, ki seng trei mon sngewbha ha ryngkat ki jingai jingmut jong ki katto katne ki ‘riew rangbah jong ka shnong.
La pynïaid ïa kane ka jingïalang da u bah Kitborsing Lyngdoh, President Seng Samla Shnong Mawkyrwat (SSSM), la ïoh ki jingkren na u kongsan u bah L. Marthong MCS, EAC, South West Khasi Hills District, la ïoh ruh ki jinghikai na u bah S. Syiemlieh na ka Life Care Foundation, bah S.J. Kharbhih UBSI, Superintendent of Police, Dr. Bhalang Sumer, O/o DMHO bad na ka ophis DSWO South West Khasi Hills District bad kiwei de ki ophisar napoh jong ka distrik.