Nongpoh, Rymphang 15: Ka skulbah USTM haka 14 tarik Rymphang kala pynlong ïa kawei ka prokram kyrpang halor ka phang ‘Access to justice and fundamental rights’ ha Central Auditorium ban ïatai bad pynsngewthuh paidbah halor ki hok bad ki jingbishar ba ki paidbah ki dei ban ioh bala wan ruh ban shim bynta shitrhem da ki samla pule, ki nonghikai bad ki khraw pyrkhat khamtam ha kane ka ri synshar paidbah.
Ha kane ka sngi u Justice Robin Phukan, u nongbishar jong ka Gauhati High Court u la wan ban shim bynta kum u kongsan ban ai ka jingshai halor kumno ki paidbah kin ioh ïaka jingbishar ba hok. Ha kane ka sngi la sakhi ruh da ka jingdonlang u M Hoque Chancellor ka skulbah USTM, Prof. G. D. Sharma, Vice Chancellor, Prof. Subhram Rajkhowa, Professor Emeritus, ka Dr Anurekha Goswami, Dean, University School of Law and Research (USLR).
Haba kren ha kane ka sngi naka liang u Justice Robin Phukan u la batai bñiah shaphang ka jingioh ïaka hok kum u mawjam haka ri synshar paidbah, u la batai kumno ki hok ba kongsan ba la pynskhem ha ka riti synshar ka ri India ki pynthikna ïa ka jingïaryngkat, ka jinglaitluid, bad ka burom ïa uwei pa uwei u nongshong shnong.
U la kren shuh shuh shaphang ka bynta ba radbah jong ka tnad bishar ban ïada ïa kine ki hok bad ban pynthikna ba ka hok kan dang long kaba lah ban ïoh, khamtam eh ïa ki bynta ba shah kyntait bad kiba rit paid ha ka imlang sahlang bad lyngba kane ka sngi kala long ka jingkyrkhu kaba khraw ïaki paidbah kiba sngap.
