Pynlong ka seng kynthei Nongjri Umsohlang ïa ka career guidance programme ban pynshlur ïa ki samla

Nongpoh, Ïaiong 8: Ka Seng Kynthei Nongjri Umsohlang mynta ka sngi ka la pynlong ïa ka prokram ai jinghikai kaba la tip kum ka “Career Guidance cum Awareness Programme on Civic Sense” ha Nongjri Presbyterian Secondary School, Nongjri, da ka jingthmu ban ai jinghikai bad ïasyllok ïa ki samla pule halor ka jingjied ïa ka lynti kaba dei ha ka jingim.
Ka thong jong kane ka jingïalang ka long ban kyntiew ïa ka jingtip jong ki khynnah skul, khnang ba kin sngewthuh shai ïa ka jingïaid lynti kiba lah ban jied hadien ka jingpule, bad ban pynshlur ïa ki ba kin trei shitom ban poi sha ka thong kaba ki angnud ryngkat ka akor ka burom haka jingim ba man ka sngi.
Ha kane ka sngi, u Bah Phyrnai Marbaniang, ophisar sorkar ba la shongthait kum u Deputy Director ka tnad DIPR, u la long kum u Resource Person, ha kaba u la ai jingïakren bad jingïasyllok halor ki bynta bapher bapher jong ka jingim bad kumno ki samla kin jied ïaka lawei bad ka lynti kaba dei laka long haka kam ka jam ne ka jinglong jingim. Ha kane ka sngi la synran lang ruh da u Bah B. Jarain, Assistant Director ka Information and Public Relations, Shillong.
La donlang ha katei ka prokram ki nongkitkam ka Seng Kynthei Nongjri Umsohlang kynthup ïa ka President ka Kong Trustodian Sohtun, ka Secretary ka Kong Ridalin Shangdiar, bad ka Headmistress jong ka skul ka Kong P. Khongbeh, ryngkat bad ki khynnah skul kiba la shim bynta shitrhem.
Haba ai jingkren, u Bah Phyrnai Marbaniang u la kyntu ïa ki samla pule ba kin don ïa ka jingthrang bad jingïai minot ha ka jingim, da kaba ong ba ka jingjop kam wan da kaba suk hynrei ka donkam ïa ka jingtrei shitom, ka jinglong ba skhem bad ka jingtip ban jied ïa ka lynti kaba dei. U la ai mynsiem ruh ïa ki ba kin trei borbah ban pynurlong ïa ki jingangnud jong ki khnang ba ka lawei jong ki kan long kaba phyrnai bad ba kin poi sha ka thong haka jingim jong ki kumba ki angnud.