Pynlong ka Seiñ Kur Shylla Khasi Jaiñtia ïa ka Dorbar Pyllun ba 7 ha shnong Mukhla

Jowai, K’Lyngkot 25: Ka Sein Kur Shylla Khasi Jaiñtia ha kane ka sngi saitjaiñ kala ïoh ban pynlong ïa ka Dorbar Pyllun kaba hynñiew jong ka haka Shnong Mukhla (madan Len) West Jaiñtia Hills District, ha kaba la wan poi da ki hajar ngut ki dkhot ka Kur kiba na Ri Lum Khasi Jaiñtia bad kumjuh ruh kiba shong ba sah shapoh ka jylla Assam (Silchar).
Ïa ka jingïalang la pynïaid da u ma Bedarius Shylla (Adviser), la pynher ruh ïa ka lama jong ka kur ha shwa ban sdang ka jingïalang. la don ruh ka jingpynkup burom ïa ki samla pule ka kur kiba la don haduh 12 ngut baroh ba kynthup haka SSLC, HSSLC kiba la ïoh 80% shaneng, ha ka kyrdan Degree & Master (Gold Medalis) bad haka Sports ïa kiba mihkhmat sha ka National Level.
Na ka liang u ma Wailadmiki Shylla uba long ruh u myntri ba dei peit ïa ka tnad ka koit ka khiah bad ka kam ïalehkai Sports ula long kum u kongsan haka jingdonlang u President ka kur ma Pyrkhat Shylla, ki nongkitkam ka Seng Kur bad ki riew rangbah jong ka Kur. La ïoh ruh ban pynsngew ïa ka Financial Reports & Annual Report bad la pyllait paidbah ïa ka Calendar jong ka Kur.
U ma Wailadmiki Shylla haka jingkren ula ai ka jingïaroh ïa ki nongïalam ka Kur kila treishitom manla u snem ban pynlong ïa kum kane ka prokram ha kaba ki khun ka Kur Shylla kila ïoh lad ban wan ïa kynduh lang kum shi para, ula kyntu ruh ïa ki khun ka kur khamtam eh ïa ki khun samla ba kin long kiba minot ha ki jingpule khnang ba kin long ki nongkyrshah jong ka Kur ha ki sngi ban wan ban.
Kum u nongmihkhmat MLA na ka Kur Shylla ula kular ban ïasnohkti lang bad ka kur ha kiba bun ki jingdonkam bad ban ïarap ïa kino kino ki kam jong ka Kur, haka juh ka por ula pynsngew katba u dang long u MLA u kular ban ïarap pisa ïa kino kino ki khun samla jong ka kur kiba la pass bha shakhmat ha ki jingpule da kaba synñiang 50 hajar marwei.
Shuh shuh ula buh ka jingkyntu ïa ki nongïalam ka kur ba kin long kiba stad kumno ban ïarap pynmih pisa ïa ka Kur, khnang ban dap ban biang bad ban kyrshan dalade ïalade hi, haka juh ka por u kyntu ïa ki kmie ki kpa ba kin pynlut ïa ka por jong ki bad ki khun khnang ba kin lait na ki jingsniew ba bun jait.
Shi bynta ban ai nam ïala ka kmie la jong u MLA ula pynsngew shibun ki Tournament phutbol bala pynlong la ai nam ha ka kmie jong u, kaba long kum ka dak jong ka jingkyrkhu ha ka jingim jong u kaba ula ïaid lynti na u khunswet sha u samla pule, na u nongtrei bylla sha u MLA bad sha u Myntri.
Ula kyntu ïa ki nongïalam ka kur ki dei ban kner lang ïa ki kti jingïarap sha ki khunswet. Ha kaba ïadei bad ka ophis jong ka Kur u kular ban ïatreilang ban pynshna ïa ka, ula ai khublei ruh ïa ki paidbah kiba la shañiah ïa ka kur da kaba pynmih haduh 3 ngut ki MLA ban shakri ha ka synshar paidbah.
La pynphuh pynphieng shuh shuh ïa kane ka sngi da ki jingshad ki jingrwai tynrai bad kiwei de bala shim bynta da ki Unit bad ki Block bapher bapher jong ka kur. Haba pynkut ïa ka jingïalang la pynhiar ïa ka lama jong ka Sein Kur Shylla Khasi Jaiñtia.