Jowai, Lber 23: U Pastor Mechak Shylla uba long ruh u Pastor haba kren haka sngi long Dorbar Pyllun kaba Saw jong ka Seiñ Kur Shylla West Jaiñtia Hills ha Sabah Muswang Hall ïa ki samla, ula ong ka pyrthei ka long kaba eh bha mynta ki sngi haka jingïadei bad ka jingnang jingstad da kaba ong ba wat haba la ïoh haduh 80% shaneng ki marks ruh wat tang ban ïoh Admission ha ki jaka pule ne College ka long kaba eh.
Ula ong mynta ka pyrthei kala bun kiba nang bastad kaba la long ka jingïakhun (Competition) ïa ki samla pule mynta haba thmu ban leit pule sha kiwei pat ki kyrdan bakham shalor, ula ong ruh mynta ki sngi ki kmie ki kpa kim pynleit skul shuh ïa ki khun jong ki na ka bynta ban ïoh kam sorkar hadien ka jingpule, namar mynta ym shuh kum ka por kaba mynshwa, ym dei ban khmih lynti ban ïoh ïa ka kam sorkar hynrei lada don ka jingstad lah ban trei ïa shibun kiwei pat ki jait kam.
Shuh shuh ula kyntu ïa ki samla ba kane ka jingpynkup burom ïa ki ka long tang kum ka jingpyn kynmaw ïa ki, ba kin nang ïaid trei shitom shuh shuh nangne shakmat, na ka bynta ban long ki khlur ki ban wan rah ïa ka nam ka burom ïaka kur bad ka jait bynriew.
Na ka liang u ma Meshak ula ai ka jingïaroh ïa ki nongkit kam ka seng Kur, ba ki la lah ban pynlong ïa kum kane ka jait programe kaba donkam bha na ka bynta ki samla, u ma Meshak kum u Pastor ula ai ka jingsngeng jingkyntiew ïa baroh ki para kur kiba la wan sha kane ka jingïalang jong ki Kur Shylla.
Ïa ka jinglang mynta ka sngi la pynïaid da u ma Barnes Shylla, ha kaba la ïoh ruh ki jingkren na u President Seiñ Kur Shylla ma Pyrkhat Shylla.
