Pynlong ka SBI Nongpoh da ka Financial Literacy ban hikai ïa ki jingmyntoi ba ïoh na ki Bank

Nongpoh, Jylliew 08: Shi bynta na ka thong jong ka Azadi ka Amrit Mohotsav ban leh burom ïa ka jingdap 75 snem ka ri India ba ka la ioh la ka jong ka jingsynshar Laitluid bad ba ka la kiew ha baroh ki liang, ka State Bank of India Nongpoh Branch mynta ka sngi ka la pynlong da ka Financial Literacy ha Ing Dorbar Hall, Sajer Nongpoh.
Ka jingthmu jong kane ka Financial Literacy ka long ban ai jinghikai kyrpang ïa ki paidbah nongshong shnong ka District ba kin sngewthuh halor ka jingmyntoi ba ki ioh na ki Bank bad ki dei ruh ban don la ka jong ka account ban poi sha ka thong katkum ka jingthmu jong ka sorkar India ba la tip kum kata ka Digital India.
U Additional Deputy Commissioner ka Ri Bhoi, u Bah M.B Tongper u la wan ban shim bynta kum u kongsan ha ka jingdon ryngkat ki nongmihkhmat na ki Bank bapher bapher kiba don ha Ri Bhoi. Nalor ki nongmihkhmat na ki Bank kiba la wan ban pynsgewthuh sha ki paidbah la shim bynta ruh da ki paidbah nongshong shnong bad kito kiba ioh jingmyntoi na ki bank.
Ha kane ka sngi na ka liang ki bank bapher bapher kynthup ka SBI, Nongpoh Branch ki la sam ruh ïa ka sanction letter na ka bynta ki nongioh jingmyntoi ba kynthup ïa ka KCC Loan, Business Loan bad ka PMEJP loan sha kito ki nongioh jingmyntoi ba la jied kyrpang da kitei ki bank.Haba kren kum u kongsan, u Bah M.B Tongper u la pynpaw ka jingkmen ban ïa don bynta ha kum kine ki jaid prokram kiba la pynlong da ki bank, bad ka jingthmu ba kongsan ka long ban ai jinghikai shaphag shibun ki jingmyntoi ba ki paidbah ki dei ban ioh na ki Bank.
U la ong ruh ka sorkar India ruh ka la pyntreikam shibun ki skhim kyrpang ban ïarap kyrpang ïa ki nongshong shnong ka ri ba kynthup kum ka skhim PBJBY, PMSBY, APY bad ka National Pension Schemes bad kiwei kiwei ki skhim kyrpang, hynrei ka dei ka kamram jong ki nongshong shnong ba ki dei ban shim kabu khnang ba kin dup ioh jingmyntoi.