Nongpoh, Risaw 31: Ka ophis u District Sports Officer ka Ri Bhoi ryngkat ka bor synshar District na Ri Bhoi mynta ka sngi ki la pynlong ïa ka jingïamareh thong ba la tip kum ka National Unity Day Run 2022 bad kaba dei ruh shi bynta ka jingrakhe ïa ka Rashtriya Ekta Diwas.
Ha kane jingïamareh thong la wan ban shim bynta naduh ki samla kynthei bad shyrang bad don ruh ki riew rangbah ha kaba ïa kane ka jingmareh thong la sdang na ka Shnong Jyntru bad la pynkut ha Indoor Stadium ka NSCA ha Nongpoh.
Ïa kane ka jingïamreh thong la plie bad kaweh lama da u Additional Deputy Commissioner ka Ri Bhoi, u Bah D. Masar kum u kongsan bad la sakhi lang ruh da ka jingdon lang u District Sport Officer ka Ri Bhoi, u bah Bobby Nongbeit lem bad kiwei kiwei ki ophisar sorkar na Ri Bhoi.
Kum ka jingai mynsiem bad ka jing pynshlur ruh ïa kito kiba la wan ban shim ha kane ka jingïamareh thong na ka liang ka ophis u District sport Officer ka la sam ruh ïa ka khusnam pisa na ka bynta ki nongjop. Kiba wan nynkong ki ioh khur ïa ka song pisa kaba Rs. 5,000, ba wan baar ki ioh khur ka song pisa kaba Rs. 3,000 bad kiba wan balai ki ioh khur ïa ka song pisa kaba Rs. 2,000 bad la sam ruh ïa ka khusnam kyrpang na ka bynta kito kiba wan shim bynta kiba la heh ka rta kynthup kynthei bad shynrang.
