Pynlong ka ophis u DC ka EJHD da ka Podcast kum ka lad ban pynbna paidbah ïa ki skim sorkar bapher bapher

Khliehriat Jylliew 24: Ka ophis u Deputy Commissioner ka East Jaiñtia Hills District, mynta ka sngi ka la pynlong lane pyllait paidbah da ka Podcast prokram ka ban long kum ka lad ban pynsaphriang sha ki paidbah ïa ki skim bapher bapher kiba wan na ka sorkar pdeng, ïa kane ka podcast la plie da u Deputy Commissioner ka East Jaiñtia Hills District, u Abhilasah Banarwal, IAS ha ka jingia dong ryngkat lang ki Additional Deputy Commissioner, u bah S.S.Syiemlieh, u bah J.Shylla lem bad kiwei kiwei ki heh sorkar jong ka district.
Ha kane ka podcast ba la pynlong mynta ka sngi, la ïakren halor ka skim nongrep ‘FOCUS’ ba la pyntrei da ka tnat Basin, ha kaba ka tnat ka la buh thong haduh 487 tylli ki kynhun (PGs) na Saipung Block ha ka mang tyngka kaba T50,00000 tyngka bad 502 tylli na Khliehriat Block bad kat haduh mynta ka tnat ka dang lah ban pyntreikam 240 tylli ha ka mang tyngka kaba T 4145000 tyngka bad ka tnat Basin kan nang ïai bteng shuh shuh ban pyntreikam.
U Abhilash Banarwal, IAS, u la pynpaw ïa ka jingangnud jong u ban wanrah ïa ka jingiajan hapdeng ka sorkar bad ki paidbah khamtam kito kiba na ki thaiñ nongkyndong, ha kaba la pynlong ïa kane ka podcast da kaba khmih lynti ba ki paidbah kin ioh ïa ka jingtip lyngba ki pathai khubor halor ki skim ba la pyllait da ka sorkar pdeng bad ong ruh ba baroh ki nongshongshnong jong ka ri ki dei ban ioh jingtip shaphang ki skim, kumno ban aplai bad ka dei ruh ka bynta jong ki tnat sorkar kiba don hapoh ka district ban wanrah ïa ka jingiajan bad ki nongshongshnong bad ong ruh ba lyngba kane ka podcast kaba yn pynlong man la ka taïew, ki padibah kin ioh jingtip ïa ka jingiongjingmyntoi na ki skim, kin ioh jingtip ruh ïa ki kot kiba donkam (documents) ban pynpoi ryngkat bad ki form, kane ka long ruh ka jingpynkup bor ïa ki paidbah ba kin mih sha khmat ban ïoh jingmyntoi na ki skim, u la ong ruh ba ïa kane ka podcast pyn pyllait paidbah lyngba ki whatsap, facebook bad ha ki website bad lyngba ki pathai khubor man la ka taïew .
Ïa ka Podcast (audio) la pynbit pynbiang da u ADC East Jaiñtia Hills District, u bah J.Shylla bad u bah Juhhi Nanghuloo, uba dei u P.A jong u Deputy Commissioner, haba kren halor ka skim FOCUS kaba dei ka skim nongrep, la ong ba kane ka prokram ka dei kaba la sdang pyntreikam da ka sorkar jylla naduh u snem 2021, ka jingthmu ka long ban iarap ban kyntiew ïa ki nongrep da kaba bthah ïa ki nongshongshnong ba kin shna ïa ki kynhun (PGs) ka ban ïarap ruh ban pyniaid ïew ïa ki mar rep jong ki.
La pynshai shuh shuh ruh ba kiba lah ban pynrung kyrteng ha kane ka prokram ‘FOCUS’ ki dei na ka bynta kino kino kiba kwah ban sdang ha kaba ki lah ban thaw ïala ka jong ka kynhun kiba dei ki para nongrep na kajuh ka shnong tangba ki dei ban don shiphew ngut shaneng bad ym dei ban palat ia ka 20 ngut ha kawei ka kynhun, ki dei ban don ka jingia sngewthuh lang para kynhun kaba na ka bynta ki jingmyntoi kiba na kane ka prokram, lyngba ka kynhun yn lah ban kyntiew ïa ka rep ka riang jong ki.
Ki kyndon ba la buh da ka sorkar, ka long ba dei ban don tang u/ka wei ban long dkhot na kawei ka longiïng, ki dkhot ki dei ban long ki hap ban leit sha ki Entreprice Fecilitation centre (EFC) ban shim ïa ka form ban pyndap, ka NGO, ka Chankilang Society kaba donbynta lang ïa kane ka prokram kan iarap ïa ki nongrep, kawei ka kyndon pat ka long ba donkam ban sngewthuh ruh ba ki shnong kiba lah don lypa ha ka skim LAMP kin nym ioh shuh ïa ki jingmyntoi kiba na kane ka skim FOCUS, hadien ba la dep ïa ki kam baroh kan sa wan ka pisa kaba la mamng na ka bynta ki Producer Group (PGs).
La ong ba ha kaba ïadei bad ki jingioh jingtip kiba bniah halor kane ka skim, ki paidbah ki lah ban ioh jingpynshai na ki rukom pathai khubor kumba la dep batai ha neng kiba lyngba ki Youtube Chanel, ki Facebook, Whatsap bad ki website.