Shillong, Naiwieng 02 : Ki samla pule shynrang bad kynthei ka Union Christian College (UCC) Umïam-Khwan ki la snohkti lang ha ka jingai snam ei ba la pynlong ha ka 31 tarik bnai Risaw 2025 hapoh ka Dr C.J. John Indoor Stadium ka College da ka NSS UCC unit Umïam.
Kumba 50 ngut ki la wan ban ai snam ha kane ka blood donation camp. Ka Regional Blood Bank Pasteur Institute Shillong bad ka NEIGHRIMS Hospital, Shillong ki long ki artylli ki Blood bank unit kiba la ïoh sngewbha ïa ka snam ha kane ka Blood Donation Camp.
Kine ki blood bank unit ki la pynpaw ka jingsngewkmen ba ki la ïoh ka jingmyntoi na kane ka Voluntary Blood donation camp bad ki la pynpaw ka jingsngewnguh bad ai khublei ïa ki nongpynïaid ka College kiba la khot sngewbha ïa ki sha kane ka camp.
La pynïaid ïa kane ka voluntary blood donation camp da u Bah Arphra Banshan Kharkongor Programme Officer NSS UCC ha ka jingïadon ryngkat kiwei ki Programmme Officer ki Doctor bad ki nurse na kine ki Blood Bank.
Ki la pynbna ruh ba kum kine ki jait programme yn sa ïaleh ban pynlong man ka snem na ka bynta ban ïarap ïa kiwei pat ki Hospital bad ki Blood Bank unit hapoh Meghalaya.
Kane ka long katkum ka kyrwoh ba la phah da u Bah Andy Rympeit, Programme Officer jong ka NSS UCC Unit.
