Shillong, Nailur 02: Ka tnat sumar khmat NEIGRIHMS, ka la pynlong ïa ka Continued Medical Education (CME) program ha Vivanta, Shillong ha ka sngi thohdieng ka 29 tarik Nailar, 2025. Ïa kane ka jingïalang pule puthi la pynlong da ka ka jingthmu ban pynthymmai ïa ki riew shemphang ha ka liang ka khmat jong ka jylla Meghalaya shaphang ki jingpynbna ba thymmai ha ka liang ka jong ka jingsumar khmat.
Ka CME, “Updates in Ophthalmology”, ka la wanrah lang ïa kiba bun ki doktor khmat – ki doktor ba sah ha katei ka jaka, ki samla pule kiba la pyndep ïa ka kyrdan pule postgraduate, bad kumjuh ruh ki nongsumar khmat na Shillong, Nongpoh, bad ki thaiñ ba marjan. U Prof. (Dr.) Tanie Natung, u khlieh ka tnad sumar khmat jong ka NEIGRIHMS u la ïalam ïa kane ka academic session bad u la pynshlur ïa ki doktor ba sah ha katei ka jaka, ki samla pule kiba la pyndep ïa ka jingpule bad ki nongmihkhmat ban pyndonkam pura ïa ka jingpule ki jingshemphang bad u la pynpaw ïa ka jingdonkam ban ïaid ryngkat bad ki rukom treikam kiba nang kiew ban pynthikna ka jingsumar kaba bha tam ïa ki nongpang, bad u la pynksan ruh ïa ka dor jong ka jingsam ïa ka jingtip bad ka jingtbit ha ka jingsumar na ka bynta ka jingmyntoi jong ki nongpang ha kylleng ka thaiñ na kine ki jingkiew.
Ka CME ka la pyni ïa ki jingkren kiba sngewthuh bad ki case presentations kiba sngewphylla da ki doktor khmat ba pawnam na ka thaiñ, kaba pynpaw ïa ki buit puid ba mynta na ka bynta ban sumar ïa ka jingpang khmat strabismus bad ka jingpang khmat cataract bad la pynleit jingmut ruh ha ki jingkiew ba dang shen ha ki dawai khmat bad ki rukom pynpoi ïa ki. Ki nongkren ki kynthup ïa u Prof. (Dr.) Tanie Natung na NEIGRIHMS, Dr. Batriti Wallang bad Dr. Wakaru Shullai na ka Mehra-Ki Eyecare, bad Dr. Hiranmoyee Das na Nazareth Hospital.
Ki doktor na ka Civil Hospital Shillong bad Nongpoh, Bansara Eye Care, Army and Assam Rifles hospital, bad ki nongtrei riew shimet jong ka thaiñ ki la leit sha ka CME. Ki nongïashim bynta ki ïashim bynta shitrhem ha ki case ba la pynshong nongrim ha ki jingiakren bad ki la ïasam ïa ki jingtip jong ki.
U Prof. (Dr.) Nalin Mehta, Director, NEIGRIHMS uba la long kum u Kongsan, u la ïaroh ïa ka tnad sumar khmat na ka bynta ka jingthmu jong ka. U Prof. Mehta u la kyntu ruh ïa baroh ki nongïashim bynta ba kin bud ka jingpule kaba shi jingim ha ka liang jingsumar khmat. Ka jingkynmaw ïa ka jinglah jong ka tnad ban shim ïa ka jinglong nongïalam ha kane ka bynta u Prof. Mehta u la tyrwa ïa ka jingstad jong ka NEIGRIHMS ban kyrshan ïa ka capacity building program na ka bynta ki nongsumar khmat ha ka thaiñ.
La pynkut ïa kane ka jingïalang da ka jingai khublei na u Dr. Dr. Benjamin Nongrum, Additional Professor ka tnat sumar khmat, ka NEIGRIHMS.
