SHILLONG, Naiwieng 13: Ka NEEPCO ka la pynlong ïa ka State Level Painting Competition halor ka phang ban pynneh pynsah ïa ka bor ding lane ‘Energy Conservation’ hapoh ka jingpeit jong ka Bureau of Energy Efficiency (BEE) ha Ophis treikam, ha Shillong.
Ha kane ka jingïakop dro dur ki la don haduh 84 ngut ki samla pule na kylleng ki district jong ka jylla Meghalaya kiba la ïashim bynta ha ki kyrdan bapher bapher, da kaba pyni ïa ka jingtbit jong ki ban dro dur bad ha kajuh ka por ka dur kaba kit jingmut ban pynsngewthuh halor ka phang ban pynneh pynsah ïa ka bor ding.
Ki nongjop ha kane ka jingïakop kin mihkhmat ïa ka Jylla ha ka jingïakop dro dur National Painting Competition on Energy Conservation ka ban sa long ha kaba kut jong une u snem.
Ki nongjop ha ka kyrdan ïakop jong ka Category A (kiba kynthup ïa ki khynnah klas 5 haduh 7): ïa ka kyrdan ba nyngkong la khur da u Biraj Sen jong ka St. Anthony’s Higher Secondary School, Shillong, bud sa u Ayush Das jong ka All Saints School, Shillong ha ka kyrdan ba ar bad Shrishti Sharma jong ka Seven Set School, Shillong ha ka kyrdan ba lai.
Ha ka Category B (Class 8 haduh 10): kiba la jop kidei Sanborstar Shylla jong ka Mawtawar Presbyterian Secondary School, East Khasi Hills, ba wan ba-ar dei u Priangshu Acharjee jong ka Laitumkhrah Presbyterian Higher Secondary School, Shillong bad ïa ka kyrdan ba lai la jop da i Neisynthei Sitlhou jong ka Auxilium Higher Secondary School, Shillong.
ïa ka jingïalang la pynkut da ka jingrwai lang ïa ka Vande Mataram, kaba long ka jingpynkut kaba shongkun ïa ka sngi kaba la aiti ban kyntiew ïa ka jingstad, ka jingpynsngewthuh, bad ka jingaiti ha ka jingpynneh pynsah ïa ka bor ding hapdeng ki samla pule.
