Mawkyrwat, ‘Nailur, 18: Ka Mawkyrwat Youth Development Association (MYDA) ha ka sngi saitjaiñ jong ka taïew ka la ïoh ba pynlong ïa ka lympung ïalehkai kaba ba la tip kum ka 1st MLA Cup 2022 kaba dei ha ki lai tylli ki bynta kita ka jingïalehkai Kynjatbol, ka Volleyball bad ka Basketball ba la pynlong hapoh madan Umkop Mawranglang Laikyntoit, South West Khasi Hills District ha kaba u bah Renikton Lyngdoh Tongkhar, Nongmihkhmat ka Mawkyrwat Constituency bad Myntri ka tnad umbam umdih jong ka Sorkar Meghalaya u la long kum u kongsan.
Ka jingthmu jong kane ka lympung ïalehkai ka long ban sei ïa ki madan ïa ki samla jong ki shnong ki thaw ba kin pyni ïa kita ki sap ki phong ba ki don bad ka long ruh kum shibynta ba teh song lang ha ka jingïalong kawei. Ha kane ka lympung ki la don haduh 32 tylli ki kynhun kiba la ïoh ban ïa shimbynta bad ha ka kane ka 1st MLA Cup 2022 yn nym shah ban wanrah nongïalehkai nabar jong ka Mawkyrwat Constituency namar ka long kawei na ki jingïalehkai ba kyrpang ba sakhi ïa ka jingtbit jong ki briew la jong ha ki jait jingïalehkai bapher bapher.
Haba phai ka ka jingïalehkai kynjatbol ba nyngkong la pynïalehkai hapdeng ka Rangblang Pombriew Sports Club pyrshah ïa ka Jakrem Sports Club, ha kaba ka Jakrem SC ka la jop da 3 – 1 kol ïa ka Rangblang Pombriew. Katba ka Rangmaw Sports Club pat ka la jop da 2 – 1 kol ïa ka Mawbidong Sports Club.
Ha ka jingïalehkai Volleyball pat ka Mawtangden Sports Club ka la shah rem noh da 1 – 2 set ha ka Mawbidong Sports Club. Katba ka Mawlangwir Sports Club ka la jop da 2 – 0 set ïa ka Mawranglang Sports Club.
Ha ka Basketball ka Sakwang Sports Club ka la shah rem noh da 13 – 12 basket ha ka Mawkyrwat Sports Association bad ka Rangblang A pat ka la jop kput da 47 – 4 basket pyrshah ïa Sohkhyllam Sports Club.
U bah Renikton Lyngdoh Tongkhar haba kren kum u kongsan, ha ka jingïalang ba lyngkot ba la lamkhmat da u bah Elevenson Wanniang, President jong ka Mawkyrwat Youth Development Association (MYDA), u la ong ba kane ka lympung ka dei kawei na ki lympung ba ki samla jong ka Mawkyrwat Constituency kin ïoh ban ïashimbynta bad ba kin pyni ïa kita ki sap ki phong ba ki ki don namar ha kane ka lympung yn nym shah ïa ki kynhun ban wanrah da ki nongïashimbynta kiba dei nabar jong ka konstitwensi. “Ban ïohi shisha ïa ki sap ba ki samla jong ka Mawkyrwat Constituency ki don la ka long ha ka jingïalehkai Kynjatbol, Volleyball bad Basketball ka long kaba donkam ban pynlong ïa kum kine ki jingïalehkai ban ïaleh tang para ba dei napoh ka konstitwensi la jong “, ong u bah Renikton.
U Bah Renikton u la ong ruh ba kane ka lympung ka dei ruh kawei na ki lad ban pynïa ithuh ithaw hapdeng ki nongïalehkai khnang ba kin don ka jingïajan bad ïa long kawei ba ka kam ïalehkai ha kane ka don ka thaiñ Mawkyrwat kan nang kiew. “Ka kam ïalehkai ha kane ka juk kam dei shuh tang ka lympung ban pynbyrnia, hynrei ka la dei kawei na ki lad ba ai kam ai jam ïa ki khun samla kiba pyndonkam hok ïa ka sap ka phong ba ki ki don”, u la ong.
Ha kajuh ka por u la pynpaw ruh ka jingaikhublei na ka bynta ka Mawranglang Laikyntoit Sports Club kaba la shah sngewbha ïa ka Mawkyrwat Youth Development Association (MYDA) ba kan ïoh ban pynlong ïa kane ka lympung ïalehkai ha ki lai tylli ki bynta.
Ha kane ka sngi la ïoh ruh ka jingkren lyngkot na u Myntri Shnong Mawranglang Laikyntoit, u bah S. Marweiñ, u Working President ka MDSA, u bah Y.G. Lyngdoh bad ka jingkren khublei na Secretary ka MYDA, bah Bhalumlang Kharlyngdoh.
